Ырчылар Данияр Эрматов менен Эдил Маматов жакында Орусияда концерт берет. Концерт алдында ырчылар даярдаткан жарнамалык роликте Данияр Эрматовду «жылдыздын жылдызы» деп аташкан. Бул боюнча ырчылар Темир Назаров, Өктөм Сапар уулу, аранжировкачы Мирлан Ниязов «жылдыз» деген сөзгө татыктуу болуу керек, бул сөз керек болсо дүйнөгө белгилүү ырчыларга айтылса да аша чаап мактагандык болуп калат деген тариздеги пикирлерин билдиришти. Ырчыга байланышып, кандайча мындай жагдай орун алып калганын сураганыбызда: "2013-жылы даярдалган жарнамалык роликте "жылдыздын жылдызы" деген сөз ошондогу продюсерим Канат Кадыржандын идеясы менен колдонулган. Ошол сөз жакындагы дагы бир жарнамалык роликке колдонулганы үчүн шоу-бизнес чөйрөсүндөгү кээ бир агаларым мени социалдык тармактардын биринен сынга алышты. 5 жылдан бери айтылып, колдонулуп келген бул сөзгө эл тарабынан эч кандай реакция болбой, анан бүгүн эле жанымда жүргөн жакын көргөн агаларым сындап жатышканына капа болдум. «Жылдыздын жылдызы» дегенди мыкты же эң кыйын деп түшүнүү туура эмес, бул жөн гана жарнамалык роликте күчөтмө сөз катары колдонулду да. Түз көз караштагы адам үчүн, жарнаманын кызыкчылыгы үчүн мындай сөздөрдү колдонуу кадимки эле көрүнүш. Ырчылардын көпчүлүгү мен тарапта болуп, сөз эркиндиги орногон өлкөдө жашап жатканыбызды да айтышты. Талкуу ырбап кеткенден кийин «жылдыздын жылдызы» деген сөзгө макул болбой жаткан агаларым менден кечирим сурашты. Мен да кичүү башым менен алар менен айтышканым үчүн кечирим сурадым",- деген жообун узатты.

star@super.kg