Спектакль коюлган күндөр – 13-14-15-март
Өткөн жери – Кыргыз улуттук драма театры
Башталышы – 19:00 (40 мүнөт кечикти)
Көрүүчүлөр – Залдын 100 пайызы (13-февраль)
Билет баасы – 500-550сом

Жакында эле Ош улуттук драма театрында Кыргыз эл жазуучусу Султан Раевдин калемине таандык «Илегилек» спектакли коюлуп, анда башкы ролду Кыргыз Республикасынын Эмгек сиңирген артисти Самара Каримова ойногон эле. Аталган спектаклге билеттер 750 сомдон сатылып жатканын коомчулук бир топ сынга алган. «Илегилектин» Бишкекте коюларын угуп, барбасам болбос дедим. Анткени коюла элек жатып талкуу чордонунда калган спектаклди көрүүгө куштар адамдар көп болчу.
Спектаклде тагдырдын оор жолундагы чайналуу, азап тартуу, адамдык баалуулук менен жаштык-мастыктын күрөшү, ден соолугунун мүмкүнчүлүгү чектелген майып чоң атасы менен анын чыканактай небереси аркылуу доорубуздун чоң көйгөйлөрү чагылдырылган. Спектакль көрүү маданияты бизде өнүгө элегине ынандым. Жанымда телефонун чукулап отурган мырзаны көрүп, аны бирөө кыйнап эле алып келип койгонбу деген ойго жетелендим. Канча айтса да Самаранын кесиби актриса эмеспи жакшы аткарды. Бирок "Илегилектеги" Жанараны көрүүчүлөр Жанара эмес, ырчы Самара катары кабыл алганы байкалып турду. Кызыгы, спектакль бүтүп кол чаап отурсак далымдан бир айым түртүп «туруп кол чапкыла!» деп буйрук берген үн менен айтса болобу. Уялганымдан туруп кол чаптым.
Ошол маалда баары «оптом» Самарага гүл сунуп, айрымдары куттуктап сахнадан жоолук салганы көзгө өөн учурады. Биз Самаранын тоюна же жеке концертине келген жокпуз го. Ошол жоруктун айынан "Илегилек" драмасынын автору Султан Раевге сөз тийген жок. "Жоолук салгычтар" жолтоо болуп сахнага сөз сүйлөгөнү чыккан ал кишини да оңтойсуз абалда калтырышты. "Илегилекти" буга чейин «Тунгуч» театрынын актёрлору аткарганын да көргөн элем. Салыштыруу иретинде айтсам, бул спектакль көбүрөөк Самарага ыңгайланышып коюлгандай. "Тунгуч" театры койгон спектаклде Жанаранын ролун ойногон актриса Таазим укмуш бийлеп образдын көркүн ачкан эле, Самара бийлеген мага жарашпай калат деп уялдыбы, айтор, музыкага келиштире бийлей албады. «Илегилек» спектаклинде өзү ойноп жүргөн Жамал Сейдакматова чыгып Самаранын аткаруучулук чеберчилигине ыраазы болуп, батасын берди.

Толик сынчы

star@super.kg