Жакында эле ырчылар Алтынай Нарбаева менен Мирбек Атабеков «Мен сени сүйөм, өмүр» аттуу дуэт жаздырып ырдап чыгышкан. Учурда эл жакшы кабыл алып жаткан бул чыгарманы айрым ММКлар «бул ыр плагиат» деп жазып чыкканы Алтынай Нарбаеванын намысына тийиптир. Ырчы бул тууралуу:
– Мен ушунча жылдан бери атымды көчөдөн топтоп алган жокмун. Маңдай терим менен тапкан атымдын кайсы бир адамдардын сөзү менен жерге чабылып калышын каалабайм. Плагиат деп айтылып жаткан ыр казак элинин ырчысы Роза Алкожа ырдап жүргөн ыр. Сөзү Жадыра Байбуланованыкы. Былтыр өзү мени концертине чакырып, конок болуп келгем. Ошол жолугушууда ал «кайсы ырымды алып ырдасаңыз ырдай бериңиз, сиздей кыргыз элинин ырчылары ырдаса мен кубанам» деген. Анын уруксаты менен быйыл Мирбек Атабеков экөөбүз «Мен сени сүйөм, өмүр» ырын аткарып чыктык. Быйыл 50 жашка чыктым, мага бул чыгарма Мирбектин чоң белеги болду. Аранжировка, үн жаздыруу, клиптин бардык каржылоосун Мирбек өзү көтөрдү. Эки элдин ортосунда ыр эмес, көп нерсе тең орток болуп келе жатат. Биз автордун уруксаты менен ырдап чыктык. Плагиат деп сөз тараткандар бизден кечирим сурабаса, өз укугумду коргогонго мажбур болом»,- деп билдирди.

star@super.kg