Өлкөдө ак илбирсти коргоо боюнча жаңы меморандум түзүлдү. Меморандумга өкмөткө караштуу Айлана-чөйрөнү коргоо жана токой чарбасы мамлекеттик агенттигинин директорунун орун басары Арсен Рыспеков, ак илбирсти коргоо боюнча «Snow Leopard Trust» коммерциялык эмес бирикмесинин директору Чарудаг Мишра жана «Snow Leopard Foundation in the Kyrgyz Republic» коомдук фондунун директору Кубанычбек Жумабай уулу кол койду. Меморандумга ылайык, республика аймагында био ар түрдүүлүктү сактоого инвестиция тартуу жана ак илбирсти коргоо боюнча иш-аракеттерди активдештирүү каралган. Кыргыз жеринде ак илбирсти коргоо боюнча иш-чаралар көп өткөрүлөт.
Атай кетсек, 2017-жылдын августунда Бишкекте 12 өлкөнүн катышуусунда "Ак илбирсти жана анын экосистемдерин сактоо" деген темада эл аралык форум өткөн. Ошондой эле 2016-жылы ак илбирсти аткандарга айып пулдун көлөмү 500 миң сомдон 1 жарым миллион сомго көтөрүлгөн. Экологдордун маалыматына караганда, учурда республика аймагында 200-300дүн тегерегинде ак илбирс жашайт.