Улуттук коопсуздук мамлекеттик комитети «Электр станциялары» ишканасынын башкы директору Узак Кыдырбаев менен ЖЭБди модернизациялоо тобун жетектеген Темирлан Бримкуловду кармады. Экөө тең тергөө абагына 2 айга камакка алынды.
Кыдырбаев да, Бримкулов да Кылмыш-жаза кодексинин 221-беренеси (коммерциялык же башка уюмдардын кызматчыларынын ыйгарым укуктарын кыянаттык менен пайдалануу) боюнча айыпталууда. ЖЭБдеги аварияга карата 30-январда Башкы прокуратура «шалаакылык» беренеси боюнча кылмыш ишин козгогон. Кыдырбаев менен Бримкуловго козголгон кылмыш иши аталган кылмыш ишинен өзүнчө өндүрүшкө бөлүнүп, ЖЭБди жаңылоо иши кандай жүргүзүлгөнү иликтенүүдө. Аталган кылмыш иши Бишкек ЖЭБи, «Электр станциялары» жана Улуттук энергохолдингдин кызматкерлерине карата ачылган. Буга чейин ЖЭБдеги өндүрүштүк кырсык боюнча "Электр станциялары" ишканасынын техникалык директору Алмаз Жусупбеков жана ушул эле ишкананын жетекчисинин мурдагы биринчи орун басары Бердибек Боркоев кармалган.
Эске салсак, ушул жылдын 26-январында Бишкек жылуулук-электр борборунда өндүрүштүк кырсык катталып, калаа тургундары чилдеде 5 күн жылуулуксуз калган. Аталган аварияга байланыштуу түзүлгөн өкмөттүн мекемелер аралык комиссиясы жыйынтык чыгарып, бир нече кызмат адамдарына сөгүш жарыяланган. Премьерге бир топ чиновниктерге эскертүү берүү, кызматтан алуу сунушталган. Ал эми ЖЭБди модернизациялоого жумшалган 386 миллион доллардын иштетилишин иликтөөчү депутаттык комиссия иш жыйынтыгын чыгара элек.