Апрель айы жылдыздар үчүн жемиштүү башталды. 1-апрель күнү Айнура Салахидинова эки уулдан кийин кызын жарыкка алып келди. Эл аралык күлкү күнүндө төрөлгөн кызына ата-энеси Айкен деген ысым ыйгарышкан. «1-апрелде төрөгөнүмө көбү ишенбей, сүйүнчүлөсөм тамаша катары кабыл алышты (күлүп). Жолдошум тандап отуруп кызыбызга Айкен деген ат койду. Мен кыз төрөп алсам деп кыялданып жүрдүм эле, минтип чүрпөбүздү колума алып, бактылуу болуп отурам»,- дейт кубанычы коюнуна батпаган ырчы.
Ага удаа 4-апрель күнү кыргыз сахнасында бала кезинен бери эмгектенип келаткан Ильяз Абдыразаков да 2 уулдан кийин кыздуу болуп, бактысында чек жок. «Абдан кубанып жатабыз. Медина кесарево жолу менен төрөгөндүктөн кызымды менин көкүрөгүмө жаткызышты. Экөөбүз жарым саат кучакташып, сүйлөшүп жаттык. Үйдө Нияз экөөбүз эле болгондуктан, апам «кызым болсо» деп кыялданчу экен. Мына эми эки уулунан эки кыз небересин кучактап жыргап калды. Кыздуу болорубузду жакында гана билип, бирок аны эч кимге айткан эмеспиз. Досторум, туугандар эми гана билип, кубанып жатышат»,- дейт Ильяз.
Ырчылардын кыздарынын бешик боолору бек болсун! Келечекте ата-энесиндей атагы чыккан инсандардан болушсун!

star@super.kg