Бул апта ортосу Чемпиондор Лигасынын чейрек финалдык оюндары кызуу өттү. Рим шаарында «Рома» Месси баштаган «Барселонаны» жер каратты. Биринчи оюнда ири эсепте жеңилген римдиктер өз үйүндө эрдик жасашы керек эле. «Рома» 3:0 эсебинде жеңип, сенсация жаратты. Ал эми «Манчестер Сити» өз үйүндө да «Ливерпулга» 1:2 эсебинде жеңилип, мелдештен четтеп калды. «Сантьяго Бернабеу» стадионунда «Реал»-«Ювентус» беттеши орун алып, туриндиктерге эч ким ишенген эмес. Бирок Аллегринин шакирттери 90 мүнөт бою мадриддиктердин таш талканын чыгарып жатты. Өз үйүндө 0:3 менен жеңилген «Юве» конокто «Реалды» 3:0 эсебинде жеңип жаткан. Бирок «Реалдын» акыркы чабуулунда Васкес айып аянтчада кулаганга үлгүрдү. Пенальти. Чыр жараткан бул айып сокку Буффондун кызыл кагаз алышы менен бирге «Ювентустун» дарбазасына гол алып келди. «Реал» сүйрөлгөн бойдон жарым финалга бет алды. «Бавария» «Севилья» менен өз үйүндө 0:0 эсебинде ойноп, коноктогу жеңишинин эсеби менен кийинки баскычка чыкты.