Ырчы Расул Маматкуловдун уулу Руслан Маматкулов Орусиядагы ресторанда жана түнкү клубда ырчы катары иштеп жатканына бир жылдай болду. Ал Орусиянын ТНТ каналындагы «Песни» долбооруна катышты.
– Долбоордо Егор Криддин «Мало, так мало» деген чыгармасын аткардым. Калыстардын бири Тимати тамашалап «талантың, боюң бар экен, бирок азырынча жарабай калабыз го, арыкташың керек» деди күлүп. Арыктоо үчүн мага 2 ай убакыт беришкен. Учурда салмагым 95 килограммдын тегерегинде. Түнкү клубда, ресторанда жандуу үн менен ырдап, иштеп жатам. Эки жумушта иштеген адам чарчап калат экен, чынында арыктоо үчүн аракет да кылган жокмун. Ошентип долбоорго катыша албай калдым, бирок эми спорт залга барып, олуттуу машыга баштадым. Алдыда эл аралык деңгээлде карьера жасоо максатым бар,- дейт Руслан Маматкулов.

Эске салсак, орус шоу-бизнесиндеги «дөө-шаалар» Тимати менен Максим Фадеев бул долбоордун продюсерлери жана туруктуу калыстары.

star@super.kg