Албетте, пиццанын негизин ачытылган камыр түзөт. Бирок анын камырын ачытпай жасоого же болбосо ордуна лаваш, калама, батон колдонууга болот. Бул нерселер убактыңызды үнөмдөө менен бирге даамдуу пиццага негиз болуп бере алышат.

ЭКСПРЕСС ПИЦЦА

4 порция

Даярдоо убактысы – 30 мүнөт

Керектелүүчү азыктар:

Айран – 1 стакан

Ун – 2-2,5 стакан

Жумуртка – 1 даана

Өсүмдүк майы – 1 аш кашык

Кумшекер – 2 чай кашык

Ашкана содасы – 0,5 чай кашык

Сыр – 100 грамм

Помидор – 1 даана

Томат пастасы – 1 аш кашык

Каймак – 1 аш кашык

Орегано (кургатылган) – 0,5 чай кашык

Туз – татымына жараша

Даярдоо ыкмасы:

1. Унду элеп ага туз, ашкана содасын кошобуз.

2. Айранга жумуртканы, өсүмдүк майын, кумшекерди кошуп аралаштырып, үстүнө ундан чуурута салып, жумшак, колго жабышпай тургандай кылып камыр жууруйбуз.

3. Даяр болгон камырды 10 мүнөттөй тыныктырабыз да, 0,5 сантиметр калыңдыкта жаябыз.

4. Каймак менен томат пастасын аралаштырып камырдын бетине сүйкөйбүз. Эми үстүнө жука тууралган помидорду тизип, сүргүчтөн өткөрүлгөн сырды жана ореганону себелейбиз.

5. Пиццаны электр мешинин табасына салып, 180 градуста 10-15 мүнөттө бышырып алабыз.

БАТОНДОН МИНИ-ПИЦЦА

4 порция
Даярдоо убактысы – 15 мүнөт

Керектелүүчү азыктар:

Батон наны – 1 даана

Колбаса – 150 грамм

Сыр – 100 грамм

Жумуртка – 2 даана

Сүт – 3 аш кашык

Кетчуп – 2 аш кашык

Болгар калемпири же помидор – 1 даана

Даярдоо ыкмасы:

1. Колбаса менен болгар калемпирин жука, тегерек формада туурайбыз. Сырды сүргүчтөн өткөрөбүз.

2. Нандын калыңдыгын 1 сантиметрден кесимдерге бөлүп, аларды жумуртка менен сүт аралашмасына малып, үстүнө кетчуптан сүйкөп, тууралган колбаса менен болгар калемпирин тизебиз. Андан соң үстүнө сүргүчтөн өткөрүлгөн сыр себеленет.

4. Пиццаны 180 градуста иштеп турган электр мешине 7-8 мүнөткө салабыз. Мындай пиццаны көмөч казанга салып, капкагын жаап, жай отто 5 мүнөт бышырып алууга да болот.

ЛАВАШ ПИЦЦАСЫ

4 порция
Даярдоо убактысы – 15 мүнөт

Керектелүүчү азыктар:

Лаваш – 1 даана

Сыр – 100 грамм

Помидор – 1 даана

Болгар калемпири – 1 даана

Тоок эти – 200 грамм

Пияз – 1 баш

Кетчуп – 2 аш кашык

Өсүмдүк майы – 2 аш кашык

Даярдоо ыкмасы:

1. Пияз менен тоок этин майда туурап, майга 5-7 мүнөт кууруп алабыз. Татымына жараша туз, мурч кошулат.

2. Помидор жука жана тегерек же жарым тегерек формада тууралат.

3. Лавашты электр мешинин табасына салып, үстүнө кетчупту тегиз сүйкөйбүз да, куурулган тоок эти менен пиязды тегиз салып, помидор жана болгар калемпиринин кесимдерин тизебиз. Эми үстүнө сүргүчтөн өткөрүлгөн сыр себеленет.

4. Пиццаны 180 градуста ысып турган электр мешинде 7-8 мүнөткө салабыз. Пицца даяр.

ЭСКЕРТҮҮ! Калама жука болгондуктан туурамжыны ашыкча салууга болбойт.

Дамира Арстанова
kenesh@super.kg