– Асел менен жаңы таанышканда Аселя деп эле сактап койгом. Өзүнүн аты эле сонун да. Кийин «Золушка» дегем. Үйлөнгөндөн кийин «жена» деп өзгөртүп койдум.

– Жолдошум менен жаңы таанышып, телефон номерлерибизди алышканда атынан эле сактагам. Чогуу түтүн булатканыбызга 6 жыл болуп калды, ошондон бери эле атынан сакталып турат.

– Жаңы үйлөнгөндөн тарта эле Кундуздун номери «жарым жаным» деп сакталып турат. Жубайым жашоомдун жарымы, жүрөгүмдүн жарымы, үйүмдүн жарыгы эмеспи. Балдарым да билишет, апасы телефон чалса «жарым жаным» чалып жатат» деп мага телефонду көтөрүп чуркап келишет.

– Жубайымдын ысымы Феруза, учурда телефонумда ал Ферузахоным деп сакталып турат. Маанайыма жараша өзгөртө бермей адатым бар. Жинге тийгенде жөн эле Феруза, Феруза Медуза деп салам. Ферузочка деп сакталган да номери бар. Жаңы таанышканда ушинтип сактагам, ал ошол боюнча турат. Ал мени «пушистик» деп сактайт, менимче. Эмнеге пушистик билбейм.

– Мурда "жёнушка" деп сактап койчумун, кийин ошол сөздүн эле кыргызчасы – "келинчек" деп сактаганга өттүм. Келинчегим мени «муженёк» деп сактап алган.

– Телефонго бири-бирибизди атыбыздан эле сактайбыз. Биздин убакта алтыным, жаным деген сыяктуу сөздөр уят болчу. Ошол мүнөз калып калат экен. Мен «Саадат жарым» деп сактагам.

– Аялымды «качан келесиз?» деп сактап алгам. Менин аялым гана эмес, аялдардын баары эле жолдошуна чалганда эле «качан келесиз?» дешет го.

– Үйлөнгөнүбүзгө 6 жыл болду. Ошондон бери «мамалагым» деп сакталып турат. Урушуп кеткенде өзгөртүп салгым келет, бирок дит барбайт. Үйдөн да атынан айтпай, мамалак дейм. Азыр балдарым да мени туурап атасын мамалак дей башташты.

– Башынан эле «томпошкам» деп эркелетем. Башында «томпошкам» десем, элдин көзүнчө уялчу, азыр көнүп калды. Илима мени телефонуна «муж» деп сактап алган.

– Сүйгөнүмдү, жанымды телефонума «аюу» деп сактап алгам. Ал мени «мамалак» деп сактаган. Гастролдоп эле жүрө берет эмесминби, ошого тийишип, «мамалашка мамалак, жүрөсүңбү талаалап?» деп калат тамашалап.