Койкоюп кийинип алып концерт көргөн кандай жакшы. Көрүп отурган адамга сахнанын артындагы түйшүк, концертти уюштуруудагы кыйынчылык байкала бербейт. Ошондой түйшүктү бир нече жылдан бери көтөрүп, борбордогу, аймактардагы концерттерди уюштуруп, көптөгөн ырчылар менен иштешип келе жаткан Астра Исмаилова менен маектештик.

– Астра эже, саламатсызбы? Концерт уюштуруу өзүнчө эле түйшүк, бул жаатка кандайча аралашып калдыңыз?

– Саламатчылык. Мен Ат-Башы районундагы Кара-Суу айылында окудум. Мектепти аяктаган соң борбордогу Ишеналы Арабаев атындагы окуу жайына мамлекеттик кызмат факультетине сырттан окуу бөлүмүнө тапшырдым. Окуп жүрүп кокусунан эле КТРКга барып, администратор болуп иштеп калдым. 1996-жылы бир тууган таажездем Күмөндөр Абылов циркте 10 күн концерт берди. Ошондо билетти сатып алып, үстүнө акча кошуп сатууну мен биринчи баштадым. Бир жылдан кийин «Кубулжу, менин ырларым» деген телефестивалды уюштурууга жардам бердим. Ошондо концерт уюштуруунун түйшүгүн көрдүм, жон терим менен сездим. Ал кезде шоу-бизнес деген түшүнүк жок эле. Күндүз окуйм, кечинде билет сатам, түнү Пишпек жактагы базарда нан сатам. Ошентип жүргөндө 1999-жылы Сыймык Бейшекеев филармонияда 7 күн концерт берди. Концертте көрүүчүлөр арасында сынак болуп, 7 облустан 7 адам катыштык. Мен Нарындын атынан чыктым. Аягында токтогулдук кыз экөөбүз калдык. Элдин баары «Сыймык токтогулдук, токтогулдук кыз утат» дешти. Кол күрөштөн уттум, жылкынын этинен эмне жасалат деген суроолорго шакылдатып жооп бердим. Нарындык чабандын кызы болсом, мындай суроолорду семичкедей чагам да. Ошентип сынакка коюлган ак боз атты утуп алгам. Ал кезде Күмөндөр жездемдер менен кабаттуу үйдө жашачумун. Алар түштүккө гастролдоп кетишкен. Мен атты үйгө кантип киргизем, эптеп эле сатып салайын деп шаардын сейил багында 3 күн жетелегем. Мал базар бар экенин деле билбептирмин. Эптеп сатып, ошондо 1-жолу колума чоң акча кармагам.

– Анда турмушка чыктыңыз беле?

– Жок, чыга элек болчумун. 2000-жылы Өскөн аттуу жигит Таласка ала качып кетти. Бир жылдан кийин уулубуз төрөлдү. Турмушубуз көпкө созулган жок. Уулумду төрөгөнүмө 3-4 ай болгондо 43 жаштагы апам оорудан каза болуп калды. Апамдын күйүтүн тартып жүрүп эле артынан атам өтүп кетти. Өкүнгөнүм – ата-энем биз жаңыдан боорубузду жерден көтөрүп келе жатканда каза табышты. 8 баланы өстүрүштү, бирок бирибиздин да чайыбызды ичпей кетишти. Ошондо кичүү иним 7 жашта болчу.

Жубайлар ортосунда пикир келишпестиктер көп болот экен. Ошондо кайын журтум тарабынан мага карата «жетим, ата-энесин эрте жутуп алган» деген кептер айтылды. Ошол сөздөргө уугуп, ажырашып кеттим.

– Биринчи уюштурган концертиңиз кайсы болду?

– Сема менен Кундузга администратор болуп 1-концертин уюштурдум. Кайсы жерге концерт коюп барбайлы, аншлаг менен өттү. Ортодо «концерт берем» дегендердин баары менен иштештим. Бир жолку концертте Гүлжигит Сатыбеков келип калды. Ага мен өзүм иштешүү сунушун айттым. Ошентип Гүлжигит экөөбүз 4-5 жыл ийгиликтүү иш алып бардык. Оштогу концертибизде 10-15 билетке мөөр коюлбай калыптыр, ошонун айынан Гүлжигит экөөбүз таарынышып кеттик. Мени аны "караларга" салып берип, бутун сындыртыптыр" деп да чыгышты. Антмек түгүл, жаман-жакшы айтышкан жокпуз. Азыр Гүлжигит үйлөнүп-жайланды, 2 кыздуу болду, аман-эсен. Буту-колу сынбай эле жүрөт.

– Интернеттеги баракчаңызга "бир эркек менен эркекче салгылашам" деп жазып жатасыз, эмне болду?

– Атын айтпай эле коёюн, бир ди-джей жөнүндө жаздым. Ал мени барган жеринде ушактайт. Мен билдирүү жазгандан кийин бирөө ортого түшүп, «Астра, токтот» деди. Ошону менен азырынча токтоп турам, болбосо эркекче эле мушташууга да даярмын.

– Акыркы учурда абак кызматкеринин кийимин кийген сүрөттөрдү илип жатасыз, киного тартылдыңызбы же жумушка орноштуңузбу?

– Кайдагы жумуш, киного тартылгам. Ырысбек Жабиров тарткан тасмада абак кызматкеринин ролун аткардым. Азырынча тасма жарыкка чыга элек. Өзүмдүн ролум аябай жакты. Көргөндөр да «роль өзүңө жарашыптыр» дешти. Камерадан коркпойм, той алып барып тамадалык да кыла коюп жүрбөймүнбү. Ошондон улам берилген ролумду ийине жеткире эле аткардым окшойт.

– Рахмат маегиңизге, ишиңизге ийгилик.

Сүйүн Кулматова
star@super.kg