Нью-Йорктогу “Евразиялык демократиялык демилгелер” уюму Кыргыз жеринде 8 жылга соттолгон саясатчы Өмүрбек Текебаевдин иши боюнча атайын баяндама жасады. Анда “Ата Мекендин” лидери саясий мотивде соттолгону, анын ишин кароодо адам укуктарын коргоо боюнча улуттук мыйзамдар менен эл аралык келишимдердин нормалары бузулганы айтылат. Аталган уюмдун директору Питер Залмаев “Азаттыкка” берген маегинде Текебаевдин иши кайра каралышы керектигин белгиледи. Айтымында, бир айдын ичинде Варшавада ЕККУнун Демократиялык институттар жана Адам укуктары бюросунун кезектеги сессиясы өтөт. БУУнун Кыйноолорго каршы комитетинде Кыргыз өлкөсүндөгү окуялар талкууланат. “АКШнын Мамлекеттик департаментинин келерки жазда жарыялана турган адам укуктары боюнча глобалдык баяндамасында Текебаевдин иши камтылат. Эгер Кыргызстанда Текебаевдин иши кайра каралбай, ушул бойдон кала берсе, анда Кыргыз өкмөтүнүн беделине олуттуу сокку урулат”,- дейт Залмаев.

Автандил Добулбеков
politika@super.kg