Элдин жарпын жазып күлдүргөн куудул Борончу Кудайбергенов бул жолу капа. Анткени биринчи эмес, үчүнчү жолу үйүнө уурулар кириптир: "Азыр социалдык тармактар деген укмуш болбодубу. "Биз Ысык-Көлдө эс алып жүрөбүз" деп сүрөт коё калган экенбиз. Жыргап жатсаңар мына сага деп кириптир. Мурунку эле кирген терезеден кирип, түз эле сейфке барып талкалап ичин ачышыптыр. Мурун эки жолу уурулар киргендиктен, сактанып акчаны банкка эле сактап калганбыз. Сейфте жубайымдын алтын-күмүштөрү сакталчу ошолорду алып кетиптир. Мурунку жолкусунда милиционерлер “алтындарыңар уурдалбаптырбы?” деп сураса, "жок, ал сейфте болчу да" деп койгом. Балким, милиция кызматкерлери менен да байланышы барбы деп ойлоп калдым. Анткени үчөөндө тең издеп жатабыз дешкени менен, ууру табылган жок",- дейт куудул окуя тууралуу.

Борончу Кудайбергеновдун жагымдуу да жаңылыктары бар. Учурда “Ар бир айдын алтысы” долбоорунун үстүнөн иштөөдө. Аталган долбоор мурунку бийликтин кысымы менен токтоп калганын, эми сентябрь айынан баштап кайрадан элге тартууланарын айтты.

star@super.kg