Керектелүүчү азыктар:

Каттама камыр – 400-500 грамм

Ашкабак – 500 грамм

Пияз – 2 баш

Өсүмдүк майы – 5 аш кашык

Жумуртка – 1 даана

Туз, мурч – татымына жараша

Даярдоо ыкмасы:

1. Ашкабакты ичиндеги уругунан тазалап, кабыгын аарчып, сүргүчтөн өткөрүп же майда туурайбыз.

2. Пиязды аарчып, ичке туурап, өсүмдүк майына 5 мүнөттөй кууруп алабыз.

3. Куурулган пиязды ашкабактын үстүнө салып, татымына жараша туз, мурч кошуп аралаштырабыз.

4. Каттама камырды 50-60 граммдан бөлүп алып, тоголоктоп, ар бирин 2-3 миллиметр калыңдыкта тегерек формада жаябыз. Камырдын ортосуна 2 аш кашыктан туурамжы салып, шар формасындай кылып түйөбүз. Камырды ашкабактын формасына окшоштуруу үчүн чыгырык жипти камырды айланта ороп, бөлүктөргө бөлөбүз. Камырдын түйүлгөн жагы асты жагында калышы шарт.

5. Самсанын эң үстүнө жыпар мончоктон (гвоздика) же грек жаңгагынын маңызынан саябыз. Бул “ашкабак” самсанын сабагы. Эми самсанын бетине жумуртканын сарысынан сүртүп, 220 градуста иштеп турган электр мешине кызартып бышырып алабыз. 

Керектелүүчү азыктар:

Ашкабак – 750 грамм

Сүт – 400 миллилитр

Жумуртка – 3 даана

Ун – 250 грамм

Кумшекер – 50 грамм

Каймак май – 100 грамм

Даярдоо ыкмасы:

1. Ашкабактын кабыгын аарчып, чакан бөлүктөргө бөлүп, манты касканга салып бууга бышырып алабыз.

2. Бышкан ашкабакты эзип, сүт, кумшекер, жумуртка, каймак майды, унду салып жакшылап аралаштырабыз. Табитиңизге жараша мейиз, шоколад күкүмдөрүн кошсоңуз болот.

3. Кекс бышыруучу калыпты бир аз майлап, тең жарымына чейин аралашмадан куюп, 180 градуста иштеп жаткан электр мешинде кызартып бышырып алабыз. Маффиндер муздаган соң бетине кумшекер упасынан себелеп, дасторконго койсок болот.

Керектелүүчү азыктар:

Ашкабак – 500 грамм

Банан – 1 даана

Кумшекер – 2 аш кашык

Көбүрткүч (разрыхлитель) – 1 чай кашык

Ун – 200-250 грамм

Өсүмдүк майы – 200 миллилитр

Туз – татымына жараша

Даярдоо ыкмасы:

1. Ашкабактын кабыгын аарчып, үстүнө 1 стакан суу куюп, жай отто эзилип бышканча кайнатып алабыз.

2. Бышкан ашкабакка бананды туурап кошобуз да, эзебиз. Татымына жараша туз, мурч кошулат. Эми буга ун менен көбүрткүчтү аралаштырып салып, өтө суюк эмес, өтө коюу эмес ботко даярдайбыз.

3. Көмөч казанга майдан куюп, боткодон 1 аш кашыктан салып, эки тарабын тең кызартып бышырып алабыз.

Керектелүүчү азыктар:

Ашкабак – 250 грамм

Ун – 500 грамм

Ачыткы – 1 чай кашык

Суу – 3 аш кашык

Майонез – 80 грамм

Кумшекер – 2 аш кашык

Жумуртка – 1 даана

Сүт – 1 аш кашык

Туз – 1,5 чай кашык

Даярдоо ыкмасы:

1. Ашкабактын кабыгын аарчып, үстүнө 1 стакан суу куюп, жай отто эзилип бышканча кайнатабыз.

2. Ачыткы менен бир аз кумшекерди аралаштырып, үстүнө 3 аш кашык жылуу суу куюп, 10-15 мүнөткө тыныктырып коёбуз.

3. Бышкан ашкабакты эзип, ага майонез, туз, кумшекер, ачыткыны кошуп аралаштырабыз да, үстүнө унду салып камыр жууруйбуз. Камырды жылуу ороп, ачытып алабыз.

4. Ачыган камырдан кадимкидей нан жасап, бетине жумуртканын сарысы менен сүттүн аралашмасынан сүйкөп, электр мешинде кызартып бышырып алабыз. Ашкабак кошулган нан таттуу жана жумшак болот.