Ырчы Айпери Кубик кызы "Ош" эл аралык аэропортунун ишмердүүлүгүнө нааразычылык айтып чыкты:

– 21-октябрда Орусиянын Саратов шаарына мекендештерибиз тойго чакырышкан. Бир күн мурун Сүлүктү шаарында тойдо болгондуктан, Ош-Москва-Саратов рейсине билет алгам. Аэропорттун кызматкерлерине “жүктөрүм калып кетип уят болбоюн” деп эскертип айткам. Саратовго жеткенде баарынын жүктөрү келип, менин жүктөрүм жок. Саратов аэропортуна арыз менен кайрылсам, кечирим сурап “бизден кетсе чыгымдарды төлөп беребиз, бирок жүктөрүңүз келген жок” дешти. Атама (ред.: Кубик Калыков) чалып окуя тууралуу айтсам, ал сураштырды. Көрсө, жүктөрүм Ош шаарында калыптыр. "Ош" аэропортуна чалсам, кечирим суроонун ордуна жүктөгөндөргө шылтап коюшту. Кызматкерлердин мындай мамилеси жанымды кейитти. Ушундай окуяга туш болсом да, тойго бардым, бирок формаларым жок болгондуктан катыша алган жокмун. Той ээлерине да уят болдум.

Азырынча мага аэропорттон эч ким байланыша элек. Эч кандай жыйынтык жок, угушумча, жүктөгөндөрдү түшүнүк кат жаздыртышыптыр. Мен аларды иштен кетирсин же кандайдыр бир чара көрүлсүн деген жокмун. Аэропорттун тейлөөсүндөгү мындай оркойгон кемчиликти айтпай коё албадым. Андан сырткары моралдык жактан зыян келтиргендиги жана барып-келген чыгымдарды төлөп берүүнү талап кылам.

Бул боюнча "Манас" эл аралык аэропортунун басма сөз кызматынан: "Учурда окуя боюнча кызматтык иликтөө иши жүрүп жатат. Эмнеге бир жүргүнчүнүн жүгү калып калганы, ага ким жооптуу экени аныкталса, жоопко тартылат. Иликтөө иши аягына чыкса, толук маалымат берилет",- деп билдиришти.

star@super.kg