Жакында эле Айчүрөк Иманалиева Инстаграм баракчасына МАИ кызматкерлерине нааразы болгон видеону жүктөдү. Эки бөлүктөн турган видеонун бирин ырчы айым тарткан, экинчиси МАИ кызматкерлеринин видеосу. Видеодогу маалыматка ылайык, Айчүрөк айым уулу менен автоунаада келатканда МАИ кызматкерлери токтотушат. Коомчулукка видео “МАИчилер токтотконуна карабай качып кетишкен” деген аталышта тарап кеткен. Бул окуя боюнча ырчы айымга байланыштык. Ал:

– Бизди МАИчилерден качты деп чыгарышыптыр. Видеодон биздин жай ылдамдыкта баратканыбыз даана эле көрүнүп турат. Уулумду унаанын айнеги караңгылатылганы үчүн токтотушту. Мейли, айдоочу жол эрежесин бузду деп токтотушсун, айып пул салышсын. Мыйзамды сыйлаган үчүн уулум токтоп, айнектеги клеёнканы сыйрып, айып пулга жыгылып, документин берип, кечирим сурап отурат. Ага да болбой ар шылтоону айтып, убакытты созушту. Эң капа кылганы, алар жүргүнчү орундукта отурган мени видеого тартып, сайтына чыгарып салышты. Мейли, баламды айдоочу катары жарыялашсын. Бирок мени эмнеге чыгарышат, кала берсе “качып бараткан” деген жалаа менен?! МАИчилер биздин жарандык укукту тебелешти. Андыктан мен да Кыргыз өлкөсүнүн жараны катары өз укугумду коргош үчүн тиешелүү органдарга кайрылууга документтерди чогултуп жатам,- дейт.

Тилекке каршы, укук коргоо органдарынын кызматкерлери жарандардын укугун коргобой эле, тебелеп коюшат. Былтыр ырчы Клара Алибекова милиция кызматкерлерине жардам сурап кайрылып, алар жардам көрсөткөндүн ордуна видеого тартып, мазактап, интернетке таратып жиберишкен. Окуя канчалык чоң талкууну жаратса да, шылдыңдагандар жазасын алышкан эмес.

star@super.kg