Машина айдаган ар бир адам МАИ кызматкерлери менен байланыштуу окуяларга туш болот. Гезитибиздин бул санында жылдыздардын айдоочулук маданиятын байкап көрдүк.

Назми Байзакова, ырчы: “МАИ КЫЗМАТКЕРЛЕРИ МЕНИН ФОБИЯМ”

– Мен курт-кумурска, жырткычтарга караганда МАИчилерден көбүрөөк корксом керек. Эмнеге экенин билчү эмесмин. Ойлоп койчумун “мурунку жашоомдо МАИ кызматкерлеринин колунан каза тапкан окшойм” деп (күлүп). Же алардан жамандык көрбөсөм, анчалык эмнеге корком деп ойлончумун. Бир ирет өзүм рулда элем, кызымды алдыңкы орундукка отургузуп алгам, анан МАИчилерди көрө калып, кызымдын башын ылдый басып жатпайымбы. Ошондо эстесем, кичинемде апам мени дагы алдыңкы орундукка отургузуп алып “МАИчи” деп айтса эле мен дароо алдына кирип кетчүмүн. Ал учурда МАИ эмне экенин түшүнчү эмесмин, “абдан коркунучтуу бир нерсе го” деп ойлоп койчумун. Азыркы учурга чейин рулда болобу, таксиде болобу, МАИ кызматкерлерин көргөндө кубарып, колум калчылдап, жүрөгүм лакылдап баштайт.

Айнура Салахидинова, ырчы: «ЖОЛДОШУМ ЭКӨӨБҮЗ АЙДООЧУЛУК КҮБӨЛҮКТӨРҮБҮЗДҮ АЛМАШТЫРЫП МАИГЕ КАРМАЛГАМ»

– МАИ кызматкерлери менен мамилем жакшы. Жол эрежелерин сактап, МАИчилерге кармалбаганга аракет кылам. Кармалган учурларым болот, кечирим сурасам коё беришет. Көпчүлүк учурда тойго шашып баратканда кармалам. Бир ирет улуттук кийим менен унаа айдап баратсам, МАИчи тосту. Документтеримди берсем алып жолдун аркы бетине кетип калды. Артынан баратсам машиналар токтоп, чогулуп алышты. Эмне кылар экен дешти окшойт (күлүп). Анан уялганымдан шашып эле айдоочулук күбөлүгүмдү берсем “бул сизби?” дейт, “ооба, анан ким болмок эле?” десем, “сиз даана артистсиз го” деп күлөт. “Болгулачы шашып жатам” десем, атымды сурайт, "Атым Айнура" десем “бул жерде Санжар деп турат” дейт. Көрсө, жолдошум Казакстанга кетерде менин айдоочулук күбөлүгүмдү, мен анын айдоочулук күбөлүгүн алып кетип калыптырбыз (күлүп). Экөөбүздүн документтерибиз бир жерде болчу да. Баарын түшүндүрсөм, түшүнүп, коё беришкен. Дагы жакшы, жолдошум МАИчилерге кармалбаптыр. Ал келгенде айтып берсем, аябай күлгөн. Ушул окуядан кийин документтерибизди өз-өзүнчө коюп калганбыз.

Эркин Эгембердиев, актёр: “МАИЧИ ТОСУП АЛЫП, ӨКҮЛ АТА ШАЙЛАДЫ”

– Мен МАИчилер менен жакшымын, көбүнчө таанып коё беришет. 7 жылдан бери машина айдайм. Эң көп 375 сом айып төлөгөм. Жол эрежесин бузбаганга аракет кылам. Жакында эле Медеров жана Абай көчөлөрүнүн кесилишинде бир жаш МАИчи тосуп алып таанышып, “мен сизди көптөн бери издеп жүргөм, жакында үйлөнөм, мага өкүл ата болуңуз” деп телефон номеримди алып калган эле. Тамашалады го десем, жакында чалып “тойго келиңиз” деп тойго чакырды. Мен таңданып эле калдым. Ошентип, буюрса, 21-декабрда МАИ кызматкерине өкүл ата болгону жатам. Мен негизи МАИчилерди сыйлайм, кээде өздөрү эрежелерди билбегенде жиним келип кетет. Өзүмө керектүү белгилерди бир аз болсо дагы окуп билип алгам. Бирок радиодо иштеп жүргөндө бир кызыктуу факт окуган элем. Мындан 10 жыл мурун Европада, кайсы өлкөдө экени так эсимде жок, МАИ кызматкерлери жолдон жашынып тосушса коррупцияга шектелип, жумуштан алынчу экен, бизде болсо МАИчилер жашынып эле тосуп жатышпайбы, көрүнбөй бурчтан чыга калып. Көрүп турса эч ким эрежени бузбай айдамак.

Актан Рыскелдиев, тамашоучу: “МАИ КЫЗМАТКЕРЛЕРИН ЖАКШЫ КӨРӨМ”

– МАИчилер менен достук мамиледемин. Негизи жол эрежесин көп бузбайм, тойго же бир жакка шашып баратканда далбастап кетип, ошондон кармалам. Эрежени бузуп токтоткондо, “сразу” эле: “Кечирим сурайм, буздум, шаштым, минималдуу айып жазып берип коюңуз, ээ?”- дейм. Коркутуп-коркутуп туруп коё беришет, “азаматсың, чыгармачылыгыңды сыйлайбыз” дешип. Кээ бирлер бар, тааныса дагы таанымаксан болуп айып жазып киришет, ошондо жетонунун номурун көрүп туруп, атын сурап айтам, “баланча номуру бар байке жөнүндө видео же вайн тартып салбасамбы” деп. Тартпайм деле да. Анан жанындагы башка МАИчилер “кой, коё берели” дейт. Бир эле жолу айып төлөгөм. Түшүп барып, “Байке, алдымда кетип бараткан унаалар “алдыда МАИ кызматкерлери бар” деп фарасы менен белги бербей койбодубу” деп тамаша менен кырдаалдан чыгып кетейин десем болбой айып жазып берди. Барып төлөп келе калгам. Бишкектеги МАИчилер жакшы. Баарына салам! Жакшы көрөм силерди. Кийин кармалганда жүзүм жарык болсун да (күлүп).

Жаңыл Ниязбекова
star@super.kg