Ырчы Максат Садырбеков Инстаграм баракчасы аркылуу өзү жарым жылдан бери айдап жүргөн Лексус GS300 машинасын ойнотуп, 8-январь күнү жеңүүчүгө автоунаанын ачкычын тапшырды. Оюн эмне максатта уюштурулду деген кызыгуу менен ырчы мырзага байланыштык:

– Автоунаа ойнотуу тууралуу идея жайында келген, анан “Эмнеге ишке ашырганга болбосун?” деп аракет кыла баштадым. Гив-оюндун максаты – элге жагымдуу сюрприз, белек тапшыруу. Биздин оюнда жөн гана мага жана оюнду уюштурууга жардам берген адамдардын Инстаграм баракчасына катталып, өзүңдүн атыңды, утуп калсаң байланышуу үчүн номериңди калтыруу керек болду. Оюн учурунда бекер ойнотуп жатканыма ишенбегендер, “жарым акчасын берейин, эч кимге айтпайм мага сат” дегендер болду. Бирок мен антип элди алдоодон алысмын. Гив-оюн 1 ай аралыгында өтүп, катышууну каалагандардын саны 45 миңге жетти. 31-декабрь күнү рандом программасынын жардамы менен түз эфирде жеңүүчүнү таптык. Байге Кеминдин жөнөкөй тургуну, Рахат аттуу 2 балалуу айымга буюрду. Ачкычты колуна алганга чейин Рахат эже утканына ишенбей жатты окшойт. Эми өзүм иштеп, кайрадан машина алам. Азырынча такси кызматын колдонуп жатам,- дейт Максат.

star@super.kg