ЫШТАЛГАН УЙ ЭТИ

Керектелүүчү азыктар:

Уйдун сулп эти – 600-800 грамм
Сарымсак – 4-5 тишче
Сабиз – 1 даана
Пияз – 1 баш
Бал – 1 аш кашык
Соя соусу – 3 аш кашык
Өсүмдүк майы – 1 аш кашык
Лавр жалбырагы – 1 даана
"Жидкий дым" – 1 аш кашык
Туз, мурч, калемпир – татымына жараша

Даярдоо ыкмасы:

1. Сулп этти (кеспей) жууп, казанга салып, чий көбүгүн алып, бир аз туз салып жай отто 40 мүнөт кайнатабыз. Андан соң аарчылган сабиз менен пиязды жана лавр жалбырагын салып дагы 20 мүнөттөй кайнатып, толук бышырып алабыз. Этти суудан чыгарып, муздаганча күтө турабыз.

2. Соя соусун, "жидкий дым", балды, майда тууралган сарымсакты, калемпир, туз, мурчтун баарын кошуп аралаштырып, маринад даярдайбыз. Бул маринадга этти салып, 30 мүнөт тыныктырып коёбуз.

3. Этти тыгыз ороп, жип менен айландыра байлайбыз. Фольганын бетин өсүмдүк майы менен майлап, ага маринаддалган этти салып оройбуз. Андан соң 220 градуста иштеп турган электр мешине 20 мүнөткө салабыз. Андан соң бетин ачып, дагы 10 мүнөткө коёбуз. Закуске даяр! Жука кесип эт ассортисинин катарына тизсеңиз болот.

ГАЛАНТИН

Керектелүүчү азыктар:

Тоок эти – 800 грамм
Колбаса – 200 грамм
Мисте – 50 грамм
Туз, мурч – татымына жараша

ДАЯРДОО ЫКМАСЫ:

1. Тоок этин жууп, кагаз майлык менен сүртүп кургактайбыз. Андан соң туздан бир аз себелеп, ашкана балкасы менен акырын ургулап жукартып жаябыз.

2. Эт жука болуп жайылган соң бетине майда тууралган колбасаны жана чагылган мисте данын тегиз себелейбиз да, тыгыз ороп, жип менен байлайбыз. Андан соң ашканада колдонулуучу целлофанга кабаттап ороп, 90 мүнөт жай отто сууга кайнатып бышырабыз.

3. Бышкан этти целлофандан чыгарбай эле муздатып, андан соң муздаткычка 6 саат салып коёбуз. Тоок этинен жасалган галантин кесүүгө даяр!

ТООК ЭТИ+КОЗУ КАРЫН РУЛЕТИ

Керектелүүчү азыктар:

Тоок эти – 800 грамм
Шампиньон – 400 грамм
Пияз – 1 баш
Жумуртка – 1 даана
Сыр – 50 грамм
Өсүмдүк майы – 2 аш кашык
Туз, мурч – татымына жараша

Даярдоо ыкмасы:

1. Тоок этинен чоң кесим алып, аны ашкана балкасы менен акырын ургулап жукартып жаябыз. Жукартып жатканда улам бир аздан туз себелеп алууну унутпаңыз. Бул ыкма этке туздун жакшы сиңишин шарттайт.

2. Шампиньондорду жууп, майда туурайбыз.

3. Пиязды аарчып, аны да майда туурап, козу карын менен чогуу өсүмдүк майына кууруп алабыз. Татымына жараша туз, мурч кошулат.

4. Жукартылган эттин бетине козу карын менен пияз куурмачын салып, үстүнө сүргүчтөн өткөрүлгөн сырдан себелеп, этти тыгыз оройбуз. Оролгон эт бошоп кетпеши үчүн сыртынан жип менен байлап койсоңуз да болот. Эми этти фольга кагазына кабаттап ороп, 180 градуста иштеп турган электр мешине 50 мүнөттө бышырып алабыз. Белгиленген убакыттан кийин фольганы ачып, эттин бети кызарышы үчүн дагы 15-20 мүнөткө салабыз. Рулет даяр!

Эт азыктары толтурулган тарелкага аккомпанемент катары ар кандай соустарды, туздалган жана жаңы үзүлгөн жашылчаларды кошууга болот.

Дамира Арстанова
kenesh@super.kg