Кыргыз мушкери Рафаэль Физиев эрежесиз эр уруш боюнча дүйнөдөгү эң беделдүү уюм – UFC менен келишим түздү. "Атаман" деген каймана атка конгон Рафаэль Физиевдин менеджери социалдык тармактагы баракчасына видео жүктөп, аны дүйнөдөгү мыкты уюм менен келишим түзүшү менен куттуктады. Мушкер UFC'деги алгачкы беттешин "UFC ESPN" мелдешинде өткөрөт. Мелдеш 20-апрель күнү Орусиянын Санкт-Петербург шаарында болот. Анын каршылашы ким болору азырынча белгисиз. Атаман дүйнөлүк уюм менен келишим түзгөн үчүнчү кыргызстандык спортчу. Учурда эже-сиңди Валентина менен Антонина Шевченколор UFC`нин октагонунда күч сынашып келишет.

Атаман тай боксунун IFMA түрү боюнча Азия жана Кыргыз өлкөсүнүн бир нече жолку чемпиону. Эрежесиз эр уруш боюнча профессионалдык рингде 6 беттеш өткөрүп, баарында жеңишке жеткен.

Кубан Жумамидинов
sport@super.kg