Концерттин аталышы – Данияр Эрматовдон шоу концерт

Өткөн күнү – 1-март

Өткөн орду – Спорт ордосу

Баасы – 300-500 сом

Башталышы – 18:30 (1 саат 20 мүнөт кечигип башталды)

Алып баруучу – Санжар Мыкыев

Мыкты номерлер – Даниярдын гитаранын коштоосунда жандуу ырдаганы жана Алтынай Нарбаева менен аткарган “Апакем” дуэти

Көрүүчүлөрдүн саны – Залдын 100 пайызы

Кара каш, кара көз иним Данияр Эрматов жаздын биринчи күнүн мээлеп концерт берди. Адашпасам, мындан эки жыл мурун да жеке концертин тартуулаган. Андан бери өткөн 2 жыл аралыгында ырчы жигитте өзгөрүү болдубу, өсүш барбы, кандай жаңычылдык күтсө болот деген суроолор бар эле менде. Дээрлик бир жарым саат кечигип башталса да, концертке келгендердин аягы бир топто барып токтоду. Данияр да “кыргызбыз да, кечигип баштадык” деп кечигүүсүн “кыргызчылыкка” шылтап тим болду. Көрүүчүлөрдүн бири-бирин, ырчыны сыйлап өз убагында келген, негизи эле көпчүлүк ырчылардын эрте келген күйөрмандарын бозортуп узакка күттүрбөгөн учурун төөнүн куйругу жерге тийгенде көрөт окшобойбузбу.

Өсүү демекчи, зал толо келген элдин саны Данияр чыгармачылыкта өз жолун, өз күйөрманын тапканынан кабар берет. Сахна жасалгалоодо техникалык жабдуулардан каражат аябаптыр, көз уялткан жарыктар, чоң-чоң экрандар сахнага көрк берип турду. Ички органдарыңды аралаштырып жиберчүдөй болуп адамды титиреткен даңка-дүңк музыка, жалтыр-жултур тигилген формалар, жаңы ырлар. Айтор, “эки ай даярдык көрдүм” деген ырчы жигиттин ишинин натыйжасына баа берип отурдум. Тердеп-кургап ар бир ырын берилүү менен аткарып жаткан Данияр бир маалда “түйшүктүү концерт бергенче, үйлөнүп алган оңой окшойт” деп тамашалап калды. Бул сөзүнө улай эле залдан бир кызды “болочок келинчегим” деп тааныштырып салат го деп күтүп калдым. Бирок андай сюрприз тартууланган жок.

Данияр Эрматовдун концертинде вау деп көз токтоторлук өзгөчөлүк байкаган жокмун. Концерт учурда кыргыз ырчылары адат кылып алган кадимки “классикалык” сценарийде өттү десем жаңылышпайм. Бийчилердин коштоосунда аткарылган ырлар, ортодо элге күлкү тартуулаган балдардын номери (бул ирет “Универсал” командасы), ырчынын кесиптештери келип куттуктап өзүнчө да, күндүн күнөөкөрү менен дуэт да аткарышканы, концерттин аяк жагында гитаранын коштоосунда аткарылган жандуу ырлар, кайрадан фонограмма, анан концерт бүттү. Ии, баса, бул сценарийге акыркы күндөрү ырчыларга ыраазычылык кат ар кандай медаль бергендерди да кошсок болчудай. Данияр Эрматов да мындай сыйлыктардан куру калган жок.

Бул концертте дагы бир байкаганым, Даниярдын өз калеминен жаралган чыгармалар көбөйүптүр. Ырчы үчүн жакшы ырдап эле тим болбостон, өзү ырдын сөзүн жазып, обонун жаратса чоң табылга эмеспи. Ал эми ал жазган ыр тарых барактарында сакталабы же шам сыяктуу убакыт өтүп эрип кетеби, аны убакыт таразалайт.

Толик сынчы