№854 14-20-март, 2019-жыл
10-март күнү Бишкектеги тойканалардын биринде Айдана Деканы ата-энеси кыргыздын каадасы менен Аваз Акимовго узатып, кыз узатуу тоюн өткөрүштү. «KG-pop музыкасын өнүктүргүм келет» деген Айдананын кыз узатуу тою заманбап стилде, адатка айланган «Жар-Жарчысы» жок өттү. Тойго Нурлан Насип, Баястан, Гүлназ Чыныбек кызы, Нурмат Садыров, Алмаз Шаадаев, Джонни, Анжелика жана башка ырчылар, эки жаштын жакындары конок болушту.
Алгач Айдананы атасы залга алып кирип, Авазга тапшырды.
Жаңы куралган Акимовдордун үй-бүлөсү. (Айдананын атасы, эки жаш, Аваздын, Айдананын апалары)
«Аваз 29 жашында үйлөнүп жатса, мен 29 жашымда Авазды Бишкекке алып келген элем. Ал 10 жашында мага келип, 20 жашында өз алдынча бөлүндү. Урматтуу кудалар, Кудай буюрса, биздин балабыз да, сиздерди «подводить» этпеген күйөө болот»,- деп ишендирип кетти Сыймык Бейшекеев.
Тойлордо кыргыздын салтын аттап өтүү мүмкүн эмес. Аваз тарап калың салынган калың конвертти кудага тапшырса, Айдананын апасы Жылдыз Деркембаева кудагыйына кийит кийгизди.
Тойдун алпаруучусу тамада Санжар Мыкыев Айдана менен Аваздын тун наристеси уул болуш керекпи же кызбы деп конокторду жарыштырып жаткан кези.
Тойдун көркүн кыргыз шоу-бизнесинин өкүлдөрү Аваз менен Айдананын достору ачышты. Жакында ата болууга камынып жаткан Нурлан Насип досунун бактысы үчүн «Эки жаш» деген ырын аткарып берди.
Кыз узатуунун эң таасирдүү жери Айдананын агасы Канат Деркембаевдин «Карындашым» деген ырын аткарган учуру болду. Ага-карындаштын сезимдерин көрүп көпчүлүк жашып да алды.
Айдана апасы менен коштошуп жатат. Жылдыз Деркембаева: «Маңдайыма бүткөн жалгыз кызымды турмушка узатканыма бирде капа болсом, бирде кубанып жатам».
Ошентип эки жаш жетелешкен боюнча турмуштун даңгыр жолуна аттанышты.
Тойдо Айдананын көйнөгү коноктордун көңүлүн бурду. Ырчы айым бул көйнөктү атайын америкалык дизайнерге буюртма менен тиктиргенин айтты.
Зал ушундай косметикалык декорациялар менен кооздолду.
Блиц-маек
– Той кут болсун, эки жаш. Айдана, зал заманбап стилде жасалыптыр. Эмнеге «Шанель» тематикасын тандадың?
– Кыз узатуу бир жолу болот. Андыктан тойду көңүлүмдөгүдөй өткөргүм келди. Көп эле тойлорго барып, ырдап, көрүп жүрөбүз. Мен алардан кичине болсо да өзгөчөлөнөйүн дедим. Кыз узатуу кызга таандык тема болуп жатпайбы. Ошондуктан кыздар темасында деп «Шанель» брендин тандадым.
– Турмуш жолуна аттанар алдында сезимдер өзгөчө болуп жатса керек?
Аваз: – Үйлөнөм деп жүргөндө көп нерсе билинбейт экен. Ошол күн келгенде сөз менен жеткире алгыс башкача сезимдер болду. Кантип эле Айдана менин жубайым болуп калат деп ишене албай кубанып жаттым. Азыр деле ишене албай жатам, бир-эки күндөн кийин көнсөм керек.
Айдана: – Тойдун башында атам менен чыкканда аябай толкундандым. Эмоциям ашып-ташып көзүмө жаш тегеренди. Мунун баары бакыттын даамы деп айтмакмын.
– Былтыр Нурлан досуң үйлөнүп, тою бир айга созулду эле. Силердики кандай болот?
Айдана: – Мени азыр ата-энем каада-салт менен узатып жатышат. Буюрса, 16-мартта Ош шаарында чоң той берсек, Бишкекте 26-мартта болот.
– Жакшы экен. Аваз, үйлөнүү кезегин эми кимге узатасың?
– Нурмат үйлөнсүн дегем, бирок сүйлөшсөк кичине көңүлү жоктой. Кийинки кезекте Данияр го
(ред.: Эрматов), ошол жактан той жыттанып жатат.
Гүлжамал Абылкасымова
Адилет Бектуров
Эржан Кадырбеков
star@super.kg
"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн..
10
1 |
| Маалымат-маанайшат порталы | 2006-2025 © SUPER.KG |
