1-апрель күнү ырчы Айнура Салахидинова уулдарынын сүннөт тоюн, кызынын тушоо тоюн жана үй тойду бириктирип элге чоң той берди. «Эки ай бою даярданган тоюбуз көңүлдөгүдөй болду» деген ырчы айым төмөнкүлөргө токтолду:

– Былтыр уулдарыбызды сүннөткө отургузганбыз. Ошондон тартып тааныштар, достор «качан той бересиңер?» деп башташты. Шартка байланыштуу пландарыбыз жылып отуруп, минтип 1-апрель кызымдын туулган күнүнө туура келди. Элди кайра-кайра чакырып кыйнабайлы деп уулдарыбыздын сүннөт тоюн, кызыбыздын тушоо кесүү жана үйдүн тоюн бириктирип, элдин батасын алдык. Тойго достор, тааныштар, кесиптештер келди. Жалпы коноктун саны 350гө жетти. Кесиптеш досторум кезектешип ырдап жатышкандыктан, той-концертке айланып кетти»,- дейт кубанган Айнура.
Эске салсак, Айнура Салахидинова 2012-жылы турмушка чыккан. Жолдошу Санжар Энназаров экөө учурда эки уул, бир кыздын ата-энеси.