«Алма сабагынан алыс түшпөйт» демекчи, ырчы Самара Каримованын уулу апасынын жолун жолдоп ырдап жүрөт. «Барсбек кичинекейинде аябай ыйлаак болчу. Тун балам болгондуктан ал ыйласа, мен да кошулуп ыйлап калат элем. Эми ыйлаак балам минтип чоңоюп, ырчы болом деп жатат» дейт Самара. Барсбек Элчиев ырчы Данияр Эрматовдун күйөрманы. Тили чыккандан бери анын ырларын сүйүп угуп, ырдап келет. Сахнада чогуу ырдаганга, чогуу ыр жаздырганга жетишти.

– Ассалому алейкум (Телефонду алганда Барсбек дароо ушинтип учурашты).

– Алейкум салам! Кимдин баласысың?
– Асандын баласымын.

– Апаң кайда иштейт?
– Апам ырчы.

– Сен канчага чыктың?
– 7ге. Сентябрда 1-класска барам.

– Жакында апаңдын туулган күнү өтпөдүбү? Кандай майрамдадыңар?
– Данияр акем (ред.: Данияр Эрматов) экөөбүз «Билем, жактырасың» деген ырды ырдап сюрприз кылдык.

– Сен Даниярды каяктан билесиң?
– Аны менен кичине убагымда таанышкам. Атам 3 жашымда тааныштырган. Чоңойгондо Данияр акемдей ырчы болгум келет.

– Дагы кайсы ырчыларды тааныйсың?
– Данияр акемди, дагы Нурматты (ред.: Садыров) жакшы көрөм. Биздикине көп ырчылар келе беришет. Алар «только» мага келишет.

– Эмне белек алып келишет?
– Менин айтканымды алып беришет. Көбүнчө «продуктыларды», алма, банан алып келишет.

– Сага ким көбүрөөк «подарка» алып келет?
– Атама, апама бере беришет да. Анан алар мага алып келишет.

– Сен ырдайт экенсиң го,ээ?
– Данияр акем менен, өзүм деле ырдап жатам, апам айтса эле. Апамдын концертинде, анан Данияр акенин концертинде ырдадым.

– Ырдаганда сага «подарка» беришеби же акчабы?
– Көп жүз сомдуктарды, миң сомдуктарды беришет. Мен акчаларды чогултам да, атам менен апама «подарка» алып берем.

– Апаңдын кайсы ырын жакшы көрөсүң?
– «Менин атам, жакшы адамды» жакшы көрөм, ошону көп көрөм. «Издебечи» дегенине Алихан укам (ред.: иниси) түшкөн (ред.: клипке тартылган), ошону да көрөм.

– Кийимдериңди апаң алып береби?
– Өзүм тандайм. Ак костюм-шым, кара рубашка кием. Данияр акем кандай кийим кийсе мен да ошондой кийинем.

– Азамат жигит экенсиң. Сага ийгилик каалайбыз!

Гүлжамал Абылкасымова
star@super.kg