Москва шаарында 8-16-июнь күндөрү артисттер арасында «Арт футбол» аталышындагы фестиваль өттү. Фестивалга жалпысынан 16 өлкөнүн искусство өкүлдөрү катышып, жыйынтыгында Орусия экинчи ирет жеңүүчү деп табылды. Бирок биздин өнөрпоздор чыгармачылык жагынан эч кимди алдына салышкан жок. Ырыскелди Осмонкулов, Тынай Алыбаев, Марат Ибраев, Атай Өмүрзаков жана башка жылдыздар фестивалдын алкагында өткөн музыкалык сынакта биринчиликти багындырышты. Кыргыз өлкөсүнөн барган команданын жаш катышуучусу бийчи Атай Өмүрзаков төмөнкүлөргө токтолду:
– Биз алгачкы жолу 2015-жылы «Арт футбол» фестивалына катышканбыз. Быйылкы турнирге даярдык мыкты болду. Мен Кытайдагы дүйнөлүк сынакка катышып жаткандыктан, Словения, Сербияга каршы оюнга бара алган жокмун. Акыркы Германия, Венгрия, Түркия менен болгон беттештерге катыштым. Биздин команда Германияга 0:3 эсебинде утулуп жатып, оюн бүтөрүнө аз калганда 4:3 эсебинде утуп алдык. Ал эми Түркия менен болгон оюнда, тилекке каршы, 2:1 эсебинде жеңилип калдык.
Футболдон тышкары фестивалда шоу-концерт орун алды. Концертте ырчылар ырдап, мен бийлеп биринчиликти багындырдык.
Чыгармачылыгы менен атаандаштарын артта калтырып, футболдо да татыктуу оюн көрсөткөн артисттерибизди жеңиши менен куттуктайбыз!

star@super.kg