Кыргыз Республикасынын Эмгек сиңирген артисти Самара Каримова келиндүү болду. Анын ырчылык менен алектенип жүргөн иниси Сагынбек Каримов 20-июль күнү сүйлөшкөн кызына баш кошту. Жагымдуу жаңылык тууралуу ырчы Самара Каримова буларды айтып берди: "Сагынбек биздин үй-бүлөнү күттүрүп келген көкүрөк күчүгүбүз. Анын үйлөнүп, үйгө келин алып келгенин ата-энем көптөн бери күтүп жүргөн. Атам сыркоолоп жүргөндүктөн Сагынбекти эрте үйлөн деп кеңеш берчү. Инимдин Азиза аттуу сүйлөшкөн кызы бар экен. Куда, кудагыйлар жолугуп, сүйлөшүп, каада-салт менен Азизаны келин кылып алдык. Эң негизгиси, келинибиз акжолтой, кайрымдуу, эл мактаган, көп балалуу бүлө болсун. Азиза Баткендин кулуну болот. 20 жашта, кесиби боюнча мугалим. Ал эми иним Сагынбек 21 жашта, музыкант. Экөө тең Бишкек шаарындагы жогорку окуу жайларда билим алышат. Кудайым буюрса, 30-июлда Лейлектеги тойканалардын биринде үлпөт той өткөрөбүз. Туугандарыбыздын көбү, атамдын жана инимдин достору, катыштарынын көбү Ошто, Бишкекте болгондуктан, 21-августта Ошто, 26-августта Бишкек шаарында да той өткөрөлү деп жатабыз".

star@super.kg