Эл арасында “Карагыз” атка конгон актриса Гүлсина Чотонованын эми ырчылык талантына күбө болобуз. Актриса бала кездеги кыялы орундалып, кумир туткан ырчысы Расул Маматкулов менен дуэт аткарганын айтат.

– Кичинекей кезимде Расул байке ар кандай музыкалык фестивалдарга катышкан популярдуу ырчы болчу, биз анын ырларын угуп чоңойдук. Кийин мен актриса болуп, анан да теле жаатында иштеп калганымда Расул байкенин үй-бүлөсү менен таанышып, катышып калдык. Бир жолу ага “жакшы ырыңыз болсо мага бериңизчи, өзүм үчүн ырдап көрөйүн” десем макул болгон. Өткөндө “жаңы ыр жаздырдым. Угуп көрчү, жакса ырда” деп калды. Угуп жактырып, экөөбүз дуэт кылалы деп чечтик. Ыр даяр болгондо Расул байке “Элге жаңы ырды сунуштап көрбөйлүбү?” деп калды. Ошентип, жаңы ырыбыз жарыкка чыкты.

Ырчылык деле искусствонун бир бөлүгү эмеспи. Бала кезден ырдаганга кызыкчумун, андыктан “баштагандан кийин таштаба” дегендей, өзүмдү бул жааттан сынап көрөйүн деп жатам. Учурдан пайдаланып жаңы ырдап жатканымды эске алып, катуу сындабай эле койгулачы деп элден сурана кетейин (күлүп).

star@super.kg