Окурмандарга дагы бир жолу күлкү тартуулагыбыз келип, "Тамаша торубузду" жайдык. 50 миң доллар гонорарга кызыккан Асеманын жана ди-джей кыз Элизанын жоруктарына өзүңүздөр күбө болуңуздар.

Алгач актриса Асеманын продюсерине чалып, Түркия, Казакстан, Кыргызстан биргелешип кино тарта тургандыгын кабарладык. Башкы ролго кыргыз кызы керек экенин, ага Асема тандалганын продюсерине айтып, тезинен "MediaStar" продакшн студиясына келишин өтүндүк. Кирип келген Асеманы түрк улутундагы Шамил бей менен тааныштырып, режиссёр Сүйүн Откеев сүйлөшө баштады.

– Асема, бул эл аралык фестивалдарга даярдалып жаткан фильм. Эми болгон аракетиңди аябай, талантыңды көрсөт. Баса, бул жактан канча гонорар аласың?
– Мм... Ал жагын мен сүйлөш­пөйм, продюсерим сүйлө­шөт.
– Эгерде тартылып калсаң, гонора­рың 50 миң доллар болот. Кино өзү 60 миллионго тартылып жатат.
– Ачык кадрлар да барбы?
– Эми анча-мынча бар десек да болот.
– Ой, жок, жок, мен анда тартылбайм.
Асема таптакыр макул болбой турганын байкап, режиссёр анын талабына көндү.
– Эми кастингдин эрежелери боюнча аябай жиниңди келти­ресиң. Өзүң жакшы көргөн жаныбарларды туурайсың, анан мушташасың, акырында ыйлай­сың. Анда баштадык.

"Тамаша торду" уюштурууга жардам берген "MediaStar" продакшн студиясына жана режиссёр Сүйүн Откеевге ыраазычылык билдиребиз.

Асыл Орозбекова, Нуржамал Жийдебаева,
tamasha@super.kg