Бала тили бал

Бүгүнкү биздин кичинекей мейман - Съездбек Искеналиевдин кызы Даткайым. Даткайым октябрда үчкө чыгат. "Р" тамгасына тили келбей "й" менен айткан сөздөрүнүн шириндигине күбө болуңуз.

– Атың ким?
– Даткайым, папам-мамам Дату дешет. Анан мен пинцессамын.
– Сен сулуу кыз турбайсыңбы, анда?
– Сулуумун. Бетиме жайа чыкты, мен ыйладым. Дивандан секийип түшүп, оозум канады. (Съездбек машинага түшүп кетсе) Ой, папам мага "намбо" (шоколад) алып келгени кеттиби?
– Ооба да. "Намбону" сага ким көп сатып берет?
– Папам "намбо", мамам көйнөк, чачка таккыч алып келет.
– Сага окшогон кыздар жакшы ырдашат го. Сен ырдаганды билесиңби?
– Мама любит "намбо", папа любит "намбо", Даткайым любит "намбо". Бул ыйды өзүм үйөнгөм. Дагы ыйдайынбы?

Зыяным жок эч кимге,
Тостокой көз бакамын.
Таш ыйгытат тентектей,
Мен ошого капамын.
На-на-на, ква-ква.

– Ой, азамат, жакшы ырдайт экенсиң. Ырчыларды тааныйсыңбы?
– Ильяз Андаштын ыйын жакшы көйөм.
– Кимге окшошсуң?
– Үйдөн жоолук салынам. Мен Неля апама (ырчы) окшошмун.
– Чоңойгондо ким болосуң?
– Вйач (врач) болом. Балдайга ийне саям.
– Мамаңа жардам бересиңби?
– Ооба, гүлдөйгө суу куям, боосок жасайм, төшөк жыйнайм. Мамама кичинекей ляличка алып кел дегем. Ал макул деген. Алып келсе мойеки (колундагы) сок менен "намбону" бейем. Папама жиним келгенде “ноймальный болчу” деп уйушам.
– Жомок билесиңби?
– Эчки балдайына чай, "намбо" алып келем деп кетет да. Мага кызыл мультик жагат. Анда мөө, му-у, кой, чу-чу бай. Алай чуйкашат.
(Ошол учурда атасы келип, сөзгө аралашты)
– Кана, Дату, айтып койчу, чай ичкенден кийин эмне деп бата кыласың?
– Папам, мамам, апам, таенем, таякем, Боку эжем, Сезим баайыбыз аман бололу, оомийин!
– Дату, сен акылдуу кыз турбайсыңбы. Айтып бергендериңди гезитке жазайын, макулбу?
– Макул.

Сүйүн Кулматова
balakai@super.kg