"Франс футбол" басылмасынын жыл сайын мыкты футболчуларга ыйгарган "Алтын топ" негизги жеке сыйлыгын Лионель Месси 6-ирет утуп алды. Муну менен ал "Алтын топторду" коллекциялоодо рекорд койду. Мессинин атаандашы болуп келген Криштиану Роналдунун эсебинде азырынча 5 "Алтын топ" бар. 3-декабрда Парижде болуп өткөн "Алтын топ" сыйлыгын ыйгаруу аземине Мессинин атаандашы Криштиану Роналду келген жок. Анткени ал бул күнү Италия чемпиондугунун мыкты оюнчусу наамын алуу үчүн Италияда болду. Криштиану Роналду бул наамга ушул жылдын жай айларында эле татыганы маалым. Ал эми сыйлыкты ыйгаруу аземи Месси “Алтын топту” алган күнгө туш болуп калды. Сыйлыкты уюштурган басылма сыйлоо аземине "Алтын топко" талапкер негизги оюнчуларды чакырган. Алар: Лионель Месси, Криштиану Роналду жана Вирджил Ван Дейк.

"Бир чети мен "Алтын топтун" алтынчысын жеңип алган жалгыз оюнчу экенимди бааладым. Жашырбашым керек, Криштиану мени менен атаандаш болгондо бир аз маанайым түштү. Анткени мен ийгиликтин чокусунда жалгыз эмес экенимди түшүндүм. Буга карабай сен ал бийиктикте жалгыз болгондо абдан жагымдуу болот экен",- деди Месси "Франс футбол" басылмасына.

Месси быйыл чындыгында мыкты болду. Леонун голдорунун арты менен анын клубу "Барселона" Ла Лиганы жеңди. Ал бул жылы 34 матч өткөрүп, 36 голдун ээси болду. Ошондой эле ФИФАнын версиясы боюнча Месси 46 добуш алып, "Жылдын мыкты оюнчусу" наамын алууга да жетишти.

Ал эми добуштардын саны боюнча Мессиден кийинки 2-орунду алган “Ливерпулдун” коргоочусу Вирджил Ван Дейк дагы быйылкы көрсөткүчтөрү боюнча мыктылардын сап башында турду. Ал быйыл өз командасы менен Чемпиондор Лигасын жеңди. Ошондой эле өзүнүн улуттук курамасы менен бирге Улуттук Лиганын финалына чыга алды.

Гүлжан Асанкожоева
sport@super.kg