Анардын сезону келип, базарларда толуп турган чагы. Адамдын организмине аба, суудай эле керек анарды тамак рационуна эмне үчүн кошуу керек экенин айтып беребиз.

Анардан эт азыктарында гана болчу 15тей амин кычкылдыктарын алууга болот. Бул жемиш организмдеги темирдин жетишсиздигин жоюп, анемияга каршы мыкты курал боло алат. Чыгыш медицинасында анар метаболизмди жакшыртууга, тамак сиңирүүнүн абалын жөнгө салууга, иммунитетти көтөрүүгө жана кандын курамын жакшыртууга колдонулат. Анар эң мыкты антиоксидант. Ал кызыл шарап жана көк чай сыяктуу тамак сиңирүүчү суусундуктардан 3 эсе жогору жардам берет. Организмдеги энергиянын деңгээлин жогорулатат. Ичеги-карындагы сезгенүү, жүрөк-кан тамыр ооруларын алдын алат. 2016-18-жылдар аралыгындагы окумуштуулардын изилдөөлөрүнө таянсак, анар эркектерге да абдан пайдалуу. Бул азык рак жана простатит дартына кабылуунун алдын алат. Ошондой эле сперматозоиддердин кыймылдуу болушун жакшыртат. Дарыгерлер анарды балалуу боло албай жүргөн эркектерге сунушташат.

Анарды чоң кишилер күнүнө бирден, ал эми балдар күнүнө жарты анар жеп туруусу керек. Салаттарга кошуп жеген да пайдалуу жана жегиликтүү. Анардын кабыгында дагы пайдалуу заттар толтура. Андыктан анын кабыгын ыргытып жибербестен кагаздын бетине жайып кургатып алуу керек. Кургатылган кабыкты чай сыяктуу эле демдеп ичсе болот. Ошондой эле демделген анардын кабыгы ич өткөктү басууда миңдин бири.

Гүлжан Асанкожоева
koom@super.kg