Көздөрүн сүзүп, эркелей сүйлөгөнү секелек кыздардай көрүнгөнү менен, бир баланын энеси Назира Айтбекова апта айымы рубрикабыздын төрүндө.

ЖОЛДОШУНА ЖАКПАГАН 5 САПАТЫ:

1. Эртең менен жумушка кечигип жатса да, “чогуу тамак иччи” деп кыйнаганы;
2. Болбогон маселелерге эле асан кайгы болуп тынчсыздана бергени;
3. Жумушка бир киришсе, эч нерсеге көңүл бурбай, өтө эле берилип кеткени;
4. Боёнууга көп убакыт сарптаганы;
5. Бир жакка барарда дайыма күттүрүп, кечке даярданганы.

БААЛАГАН 5 САПАТЫ:

1. Шайырдыгы;
2. Эркелиги;
3. Таарынычы 10 мүнөткө жетпей жазылганы;
4. Бардык тамакты мыкты жасаганы;
5. Ар кандай маселе болуп калса, түшү­нүү менен мамиле кылып, жакшы кеңешчи боло алгандыгы.

БАЛА ЭМИЗГЕН ЭНЕЛЕРГЕ КЕҢЕШ
– Баланы эмизип жатканда жагымдуу нерселерди кыялданып, жакшы маанайда болсо, балага ошол маанай сүт аркылуу берилет. Эненин сүтү сиңимдүү да болот.
– Эмизер алдында эмчектин үрптөрүн жууп туруудан эринбеңиз.
– Эмизүү учурунда баланы сылап эркелетип турса, көп ыйлаак болбойт.
– Баарынан мурда өзүңүз жеген тамак-аштарга да көңүл буруңуз. Өтө таттуу, куурулган, ачуу, туздуу тамактардан качыңыз.

ЧАЙ МАЕК
– Назира, жанатан берки кебиңе караганда, көп балалуу болууну каалайт окшойсуң?
– Жыл сайын эле төрөй бергим келет, эгер Жараткан ден соолук берсе.
– Ошентсе да шоу менен тушооң кесилип калган, иштегиң келет го...
– Учурда жаңы долбоорлорду сунуштап жатышат. Бирок көбүнчөсү эле саясатка байланыштуу экен. Азыр ойлонуп жатам. Негизи, саясат мен үчүн эмес.
– Эгерде кирешелүү сунуш түшсө, эротикалык кинолорго тартылат белең?
– Ай, жок. Миллион берем десе да тартылмак эмесмин.
– Жолдошуңа көз кыскан кыз-келиндерге кандай карайсың?
– Менин абышкамды менден башка кыздар да жактырат экен деп сүйүнөм.
– Бул жашоодо телегейим тегиз деп эсептейсиңби?
– Мени сүйгөн түгөйүм, балдан ширин балам, сүйүктүү мекеним, элим бар. Андыктан телегейим тегиз. Ал эми анча-мынча маселелер – колдун кири.
– Кандай белек алганды жакшы көрөсүң?
– Белек тандабайм. Кандай белек бербесин, баарын жактырам. Кээде бала менен отуруп эриккенде белекке алгым келгендердин узун тизмесин жазып, көрүнөө жерге коюп коём. Аны жолдошум аткарууга аракет кылат.

Бахияна Сатылганова
star@super.kg