Көзү ачыктардын айтканы келдиби? Коронавирус тууралуу Ванга 20-кылымда эле айтканбы? Эксперттер 2020-жылдагы бул вирус менен көзү ачыктардын алдын ала айткан божомолун салыштырып жаткан мезгил.

Болгариялык дүйнөгө белгилүү көзү ачык Ванга XX кылымда эле кандайдыр бир глобалдуу эпидемиялык инфекция тууралуу айткан. Ал XXI кылымдын биринчи чейрегиндеги сандар кайталанган жылы дүйнө жүзүн оор кырдаал күтөрүн, эски оору жанданып, миллиондогон адамдардын өмүрүн аларын, Чыгыштагы сары терилүү адамдар тарабынан оору тараарын, илдетти дарылоого каражат жок болорун айткан. Адистер ага каршы вакцинаны тез арада жасай албастыгын, дарылар эч кандай натыйжа бербестигин да белгилеген.

Орусиялык эксперттер 22.02.2020, 02.02.2020, 12.12.2020 кайталанган даталар экенин, “Ванга дал ушул коронавирус тууралуу айткан болуп жүрбөсүн?” деп божомолдошсо, иммунолог Марина Зуева: "Ванганын "эски оору" дегени – 2002-2003-жылдары буга окшош вирус орун алган, ошондой эле коронавирус да оору түрү катары 1965-жылы эле катталган",- деп белгилейт.

Бул жылдын февраль айы эки санынын кайталануусу астында өттү. Нумерология мындай кайталанган сандар жүз жылда бир болорун, кайталанган датада көп адамдардын жашоосунда глобалдуу өзгөрүү орун аларын айтат. Эксперттердин айтымында, мындай датада жаманга чекит коюлуп, жакшы нерсе башталат же жаман окуянын орун алышына жол ачылат. Андыктан кайталанган сандарды жөн өткөзүп жибербестен, багытын жакшыга буруп, план түзүү керек дешет.

Ал эми америкалык көзү ачык, гипнотерапевт Сильвия Браун 2008-жылы жарык көргөн “Жашоонун бүтүүсү: акыр заман тууралуу жоромолдор жана анын дал келүүсү” аттуу китебинде: “Болжолдуу 2020-жылы Жер шарына өпкөнүн пневмониясына окшош олуттуу оору жайылат. Илдет өпкөгө жана тамакка чабуул кылып, жөтөл менен коштолот. Медицинадагы белгилүү болгон ыкмаларды тоготпойт. Бирок бир убакытта оору бат пайда болгонундай эле тез жок болуп кетет. 10 жылдан кийин кайталанат да, ошону менен түп орду менен жоголот”,- деп жазган. Ал кезде бул китептеги айтылган сөздөргө маани берилбегени менен, коронавирус пандемиясы азыр бул китепке үңүлтүп жаткан учуру.

2020-жылга божомол кылган астролог Жанар Кадыралиев чычкан жылында Кыргызстанда эң кооптуу мезгилдер деп бир катар даталарды атаган. Алардын бири: 8-марттан 17-апрелге чейинки аралык болчу. Белгилүү болгондой, өлкөдө коронавирус жуктуруп алган алгачкы адам 18-мартта аныкталды.

Динара Акимова
koom@super.kg