Тып-тып... Жаз жамгырына кошулуп сен үчүн канча жолу ыйладым экен? Бүркөлгөн маанайыма окшоп күн да ачылбай койгонун карасаң.

Жан дүйнө азабы, жан дүйнө оорусу. Бул сөздөрдү мурда уктуңуз беле? Менде азыр ошондой абал. Бул ооруга даба издеп жүргөнүмө канча болду. Бири «жер котор», бири «башкага жолуксаң эле айыгасың» дешет. Башканын бирине эмес, жүзүнө жолуктум. Жардам беришкен жок. Алар анестезия сыяктуу, ооруңду убактылуу басканы менен, бул азаптан толугу менен чыгара алышпайт. Жер которуп, тиги өлкөдөн бул өлкөгө барып иштеп жүргөнүмө да 5 жыл болду. Кетем да, унута албай сагынып кайра келем. Бул жиндилик деги эле айыкпас оору окшойт.

Руслан, сага өмүрүмдүн 12 жылын арнап коюптурмун. Намысым тебеленип, жан дүйнөм үшүп турганда жолукпадың беле. Өмүрүм бычактын мизинде турганда бооруңа тартып алып, муздап калган жүрөгүмдү жылыткансың. Көз жашымдын себеби көбүрөөк сен болсоң да, сага жолуктурган тагдырга ыраазымын.

19 жаштагы сулуу болчумун. Ала качып кетишти. Апама жалбарсам да отургузуп салды. Кадырыма жете албаган бир келесоого аруу денемди уйпалаттырып койду. 1 ай өтүп тагдырыма моюн суна баштаганда күйөө сөөрөйүм ата-энеси каршы чыгып, үйлөндүрбөй койгон сүйлөшкөн кызын үйгө жетелеп келип, мени кууп чыкты. Күнөөсүз жаш кыздын тагдырын бир заматта ойрон кылып, «бир базардан өткөн» деген атты жармаштырып койду. Бул 30 жаштагы эркектин жоругу болчу. Тагдыр дептеримдеги жашоомду астын-үстүн кылган өмүрүмдүн бул сүртүмү эң оор сыноолордун бири болчу.

Көп өтпөй сен пайда болдуң. Жашоомду курчап алган сур булутту сүрүп таштадың. Сүйүү бердиң, сүйдүрүп алдың. Сени менен чыныгы сүйүү даамын таттым. Экөөбүз сонун күндөрдү өткөрдүк. Бирок... Эх, башында бир эле «бирок» бар эле. Экөөң биригип алты «бирок» жасап койдуңар го... Хе-хе. Аргасыз күлөм да. Жапжаш туруп 5 балалуу болуп алганыңа таң калам. А экөөбүздүн кызыбыз чарчап калбаганда алтоо болмок. Бирок, сага билбейм, мага «бирок» болмок эмес. Бизди таштап кетсең да медер тутуп, азыркыдай жалгыз калмак эмесмин.

Чакырдың, темселеп дагы бардым, дагы уруштук. Ачуу сөздөрүбүз менен бири-бирибизди таарынтканды адат кылып алгандайбыз.

– Мен сага канча жолу айтам, ортодо 5 бала бар. Ал бала кезимден бери, эч нерсеге жете элек кезимден бери чогуу жашап келе жатат. Жанымда болуп, кыйынчылыктарга чыдады.

– Мага жолукканда деле 20дагы жигит болчусуң. Балалуу боло элек болчусуң... Мен ага окшоп жаныңда болгон жокмунбу? Жашооңдо ушунчалык ордум жокпу?!

– Барсың, жүрөгүмдөсүң...

– Урдум сенин жүрөгүңдү!

– Эмне каалайсың менден?

– Сени менен жашаганды.

– Мына, баарын белен кылып берейин. Үстүңдө үйүң, алдыңда унааң болот. Камсыздап турам. «Пацан» сыяктуу сага жашырынып жолуккандан тажадым. Ачыкка чыгалы. Ата-энеңдин алдына түшүп алып кетейин. Экинчи аялым бол.

– Экинчи аялың болбойм! Ата-энеме мени уят кылба. Макул болушпайт. Атам үйгө киргизбей кууп чыгат...

– Андай болсо, мындан артык эч нерсе кыла албайм, кечирип кой...

– Менин ата-энеме досуң менен барып, алдынан өтүмүш болот экенсиң. Сенин ата-энең, аялың бейкапар, эч нерседен кабары жок отура берет турбайбы. Жаш баладай жашырынгандан тажадым дейсиң анан..

– Кийин баары болот да. Азыр мени түшүнө турчу. Сени дагы кетиргим келбей жатат. Качанкыга чейин бөтөн жерде тентип, келип-кетип жүрө бересиң? Эгер дагы кетчү болсоң, анда болду, кайрылба. Ушундай мамиледен улам түгөнүп баратам.

– Кайрылбайм, экинчи аялың да болбойм! Мен да тажадым! Мен да түгөнүп баратам. Жигиттерди чекесинен чертип, тандап тие турган сүлкүлдөгөн 20-25 жаш курагымда коё бербей койгонуңа ким жооптуу?

– «Башкаларды карап көр, сүйлөшүп көр» дечү элем го.

– Ха-ха. Өзүңдү угуп жатасыңбы? Жигиттер менен таанышсам, аларды коркутуп жолуна салган ким?

– ...

Биздин акыркы жолуккандагы сүйлөшүүбүз ушул болду. Үйгө келдим, баягы сары чемоданыма кийимдерди салыштыра баштадым. Чемодан жансыз болсо да көкүрөгүмө толгон арманымды угуп, кийимдерим менен кошо салып жүргөндөй. Самолёттордун жүк салынуучу бортуна ыргытылып жатып, эскилиги жетсе да ыргыткым келбейт. Тагдырлаш болуп жанымда жүрө берсинчи. Ансыз да кең дүйнөдө жалгызмын.

Мен да бирөөнүн көптөн бери издеп жүргөн кабыргасы болсом керек. Ага жолуксам, аппак чемодан алдырам. Ошондо эски жашоом менен кошо сары чемодан, сени ыргытам, ошондо таарынба, ээ?..

Нуриза