№410 10-16-сентябрь, 2010-ж.
Тамаша тор
Өткөн саныбызда эле бирдик жүктөтүп, карапайым элдин чөнтөгүнөн эч бир себепсиз акча өндүрүүнү өнөкөткө айланткан шылуундар тууралуу жазганбыз. Эми бул жолу ошого окшош сценарий менен шоу-бизнес өкүлдөрүнүн айрымдарына кайрылдык. Алардын бири ишенбей күлсө, экинчиси катуу жинденди.
«КАЧАНТАН БЕРИ ЭЛДИ ОЙЛОП КАЛГАНСЫҢАР?»
Чү дегенде эле куудул, ырчы Жеңишбек Айтиевдин телефон номерин тердик.
– Ассалоому алейкум.
– Алейкума ассалоом.
– Менин атым Азамат. Бишкек мэриясынан чалып жаттым эле.
– Азамат, Бишкек мэриясынан?.. Угуп жатам.
– Уккансыз да, жакында Бишкектин шаар статусун алган күнү белгиленет.
– 128 жылдыгы беле?
– Ооба, ошого карата элдин турмушун жакшыртуу үчүн бир долбоор иштеп чыкканбыз. Сиздин уюлдук телефонуңуздун номери утушка ээ болду.
– Ийи.
– Эки камералуу муздаткыч.
– Анан.
– Мэрияга келип документтерди толтуруп, муздаткычыңызды алып кетиңиз.
– Жакшы, жакшы, мен Оштомун да...
– Атыңыз ким болот?
– Менин атым Жеңишбек болот.
– Жеңишбек, анда биздин номерге бирдик сала аласызбы?
– Эмнеге?
– Сиз Ошто болгондуктан, биз сиз менен телефон аркылуу документ толтурабыз.
– Жок, сала албайм. Башка бирөөгө берип сала бергиле.
– Өзүңүз Бишкекке качан келет элеңиз?
– Жумуш чыкканда эле барбасам, барбайм деле.
– А бул жакта туугандарыңыз, досторуңуз жокпу?
– Жок. Алардын баары айылда, Орусияда.
– Анда эмне кылсак экен?..
– Мен ыраазымын, башкага өткөрүп коё бергиле же менден эстелик болуп калсын, силердин эле компанияда кала берсин. Кыргызстанга кошкон салымым ушул.
– Макул, байке, фамилияңыз ким болот?
– Жантөрөев (куудул досу Рысбек Жантөрөевдин фамилиясын уурдап алды окшойт).
– Макул, жакшы туруңуз, биз дагы байланышабыз.
Арадан жарым саат өткөндө кайрадан байланышка чыктык.
– Саламатсызбы, бул Жеңишбек бекен?
– Ооба, угуп жатам.
– Мэриянын бир кызматкери сиздин утушуңуз жөнүндө айткан экен. Сиз андан баш тартыпсыз. Биз “беш абонент баш тартты” деп документ толтуруп, жетекчиликке бердик. Жетекчилик “албайм десе, даректерин алып, машина менен жеткиргиле” деп жатат. Дарегиңизди айтсаңыз, жазып алайын.
– Дарегимди бере албайм. Качантан бери элдин камын ойлоп калгансыңар?!
– Жаңы бийлик элдин турмушун көтөрөлү деп чоң аракет жумшап жатса, сиз кандай түшүнбөйсүз?!
– Ош кыргыз драма театрынын маңдайындагы "Кыял" кафесин Жаңыбай досум иштетет. Жаңыбайга таштап койгула, мен барып алам.
– Жаңыбайдын телефон номерин берсеңиз...
– Тү-үт, тү-үт (катуу жини келди окшойт, айтор, телефонун өчүрүп салды)...
«ЭЧ КАНДАЙ ЛОТЕРЕЯ ОЙНОГОН ЭМЕСМИН»
Чолпонайга Түркияда эс алууну сунуштадык.
– Саламатсызбы?
– Жакшы.
– Биз “Айзирек” компанияcынан чалып жатабыз. Сизге сүйүнүчтүү кабарыбыз бар.
– Угуп жатам.
– Биздин жүргүзгөн акциянын жыйынтыгында, сиз утушка ээ болдуңуз.
– Мен эч кандай лотерея ойногон эмесмин.
– Биз да эч кандай лотерея ойноткон жокпуз. Болгону, сиздин уюлдук телефонуңуздун номери Түркияга он күндүк эс алуу билетине туш келди.
– Мындай оюн жөнүндө жарнама көргөн жок элем...
– Биз ар бир абонентке СМС билдирүү жөнөткөнбүз. Сиз окубай калган окшойсуз. Он күндүк эс алуу билетинин ичинде жолдун акчасы, түнөй турган мейманканаңыз, тамак-ашы бүт бар. Чөнтөгүңүздөн бир сом да чыкпайт.
– Сонун жаңылыгыңыз бар экен.Менден эмне керек?
– Кеңсеге келиңиз, атыңыз, фамилияңыз ким?
– Чолпонай Кенжекулова.
– Паспортуңуздун номери кандай? Мен документ толтура берейин.
– Жанымда паспортум жок, номерин билбейм.
– Мейли анда. Келишим түзгөн Түркиянын компаниясы менен сүйлөшүп турганга ушул телефонго 300 бирдик салып коюшуңуз керек.
– Бирдик дейсизби?! Бүгүн байланыша албасам, эртең байланышам, жакшы калыңыз.
Эки сааттан кийин Чолпонайдын продюсери Эрнист чалды.
– Здравствуйте (Эрнист экенин дароо тааныдык).
– Саламатсыз.
– Вы утром моей жене СМС отправили, про поездку.
– Ооба, билетти алып кеткиле.
– У вас что за компания?
– Биздин компаниянын аты – “Айзирек”. Эки жылдан бери иш алып барабыз.
– А-аа, түшүнүктүү, жакшы калыңыз. Тү-үт, тү-үт...
«АЛДАМЧЫЛАР, ҮЧҮНЧҮ ЖОЛУ ЧАЛЫП ЖАТАСЫҢАР!»
Андан кийинки торду Бекчорого ыргыттык.
– Алло, кутмандуу күнүңүз менен!
– Саламатчылык.
– Сизди куттуктайбыз!
– Эмне менен?
– Чоң утушка ээ болдуңуз, сүйүнчү!
– Болсун, болсун, оозуңарга май.
– Биз “Жаңы толкун” радиосунан чалып жаттык эле. Ачылганыбызга беш ай болду. Угармандар аудиториясын чоңойтуу үчүн абоненттер арасында утуш лотереясын ойнотконбуз. Номериңиз сизге бакыт алып келди.
– Деги эмне утуп алдым?
– 1995-жылкы Мерседес E-300 автоунаасын. Баасы 7000 доллар турат.
– Аа, жакшы, жакшы. Эмне болгон радиодон дейсиз?
– “Жаңы толкун” радиосу АКШнын “Рeople” компаниясынын колдоосу менен ачылган. Угармандарыбыздын санын өстүрүү үчүн утуштарды да аталган компания коюп жатат.
– Машинаны качан алып кетсем болот?
– Азыр келе бериңиз. Таанышып алалы, атыңыз ким болот?
– Айбек (Бекчоро экенин таанып эле турабыз).
– Менин атым болсо Айзирек. Анда убакытты создуктурбай, азыр кеңсеге келип калыңыз.
– Дарегиңерди айтып коёсуңарбы?
– Раззаков менен Киев көчөлөрүнүн кесилиши.
– Иий, бирок мен ишенбей турам. Ушуну менен, аферисттер, үчүнчү жолу чалып жатасыңар!
– Сиз эмне жөнүндө?.. Документ толтурууга келесизби?
– Макул, барса барайын.
– Паспортуңузду унутпайсыз ээ, анан ушул номерге 300 бирдик жүктөп коюңуз.
– Мына сага! Дагы башталды! Чоң кыз, жакшы кал, бирдик сала албайм. Тү-үт, тү-үт...
Чынды-калпты койгулаштырган тамашабыздын аягы ушинтип бүттү. Кудайга шүгүр, көпчүлүк телефон алдамчыларынын түпкү максатын түшүнүп калыптыр. Биздин үч каармандын тең бирдик салайын деген ою болгон жок. Жеңишбек мырза: "Укмуш окшоштуруп салат турбайсыңарбы. Мени "лох" кылбагыла дегим келди. Бирок чындап мэриянын кишилери болуп калса, уят болом деп ойлодум",- дейт күлүп. Ал эми Чолпонай менен Бекчоро утушка ишенишпегени менен, баары бир толкунданышыптыр.
Сүйүн Кулматова
star@super.kg
"Супер-Инфо" гезитинин материалдары жеке колдонууда гана уруксат. Жалпыга таратуу "Супер-Инфо" гезитинин редакциясынын жазуу түрүндөгү уруксаты менен гана болушу мүмкүн..
2
1 |
| Маалымат-маанайшат порталы | 2006-2025 © SUPER.KG |
