3-августта президент Сооронбай Жээнбеков коомчулук тарабынан кызуу талкууга түшкөн мыйзамга кол койбой, артка кайтарды. Бул – Жогорку Кеңеш 25-июнда кабыл алган "Маалыматты манипуляциялоо жөнүндө" мыйзам. Өлкө башчы “аталган мыйзам керек, бирок документти кайрадан иштеп чыгуу зарыл” деген пикирде.

“Президент мыйзамдын негизги концепциясын – ар бир адамдын укугун, эркиндигин интернет тармагында таратылган жалган жана анык эмес маалыматтан коргоонун зарылдыгын колдоп, бирок ошону менен бирге каршы пикирлери бар экенин билдирди”,- деп жарыялады президенттик аппарат.

Мамлекет башчы аталган мыйзамды ишке ашыруунун механизмдерин коомчулуктун, эксперттердин катышуусу менен кайрадан карап чыгууну сунуш кылды.

Айта кетсек, аталган мыйзамды парламент быйыл 2 айлык каникулга кетер алдында кабыл алган. Ага 79 депутат “макул”, 10 депутат “каршы” добуш берген. Демилгечилер бул мыйзамды “интернеттеги “фейк” колдонуучуларды тыюуга керек” деп сунушташты. Демилге коомчулукта “сөз эркиндигине болгон кысым” деп бааланып, көпчүлүк президент Сооронбай Жээнбековду аталган мыйзамга кол койбой артка кайтарууга чакырып жаткан.

Жолдубек Качкынбаев
politika@super.kg