Аңгеме

Сүйүү, кызганыч – ар бир адамды кыйгап өтө албаган сезимдер. Мына ушул сезимдер камтылган аңгемелердин бирин www.super.kg сайтындагы форумдан сунуш кылабыз.

Эшикте жамгыр себелеп турган экен. Кафеден чуркап чыгып кыйкырган курбусуна да карабастан, Айзирек машинасын катуу айдап кетти. Кайда, эмнеге кетип жатканын өзү да түшүнгөн жок. Бир убакта эсине келгенсип машинаны токтотту да, эки жагын карап алды. Баягы көнгөн Ала-Арчанын жолу экен. Кыйналганда, сүйүнгөндө ушул тарапты көздөй айдап жөнөйт. Негедир Ала-Арчанын абасы, табияты башкача таасир тийгизер эле.
Айзиректин оюна көп нерсе келди. “Ушуну менен биздин мамилебиз, сүйүүбүз бүттүбү?” деп өзүнөн сурай берди. Бир убакта бир нерсени эстегенсип жылмайып алды. Ошол окуялар учурдагыдай көз алдына тартылып жатты...
– Мени жакшы көрөм дейсиң, бирок качан болсо башка кыздарды карай бересиң,- деп келинчеги күйөөсүнө эркелей карады.
– Чын айтамын, жаным, эч эле ишенбейсиң да мага, үйлөнгөнүбүзгө 10 жыл болуп калды го, кызганганыңды токтотсоңчу?! Болдучу, кыйнабачы мени. Айтпадым беле, эгер мен бирөөнү сүйүп калсам, өзүм биринчи сага айтам деп.
– Кызганган деле жокмун, эгер сүйүп калсаң, чын эле аны мага көрсө­төсүңбү?
– Ооба, жаным… Бирок… сен туура шекшип жатасың. Азыр моюнума албасам болбойт го. Бир кызды жакшы көрүп калдым, каалайсыңбы, бүгүн тааныштырайын?
Айзирек бетине муздак суу чачкандай жаман болуп кетти. “Өзүм сурандым. Эмнеге сурандым? Эмне кылам эми? Ал менден жаш, сулуу болсочу?..” деп бир секунддун ичинде көптөгөн ойго камалды.
Бөлмөсүндө кийим тандай албай көпкө турду. Андан соң “кайсы атырды колдонсом?..” деп дагы ойлонду. Жашы 30га барып калса да, 2 баланын энеси болгон Айзиректин келбети, дене-мүчөсү турмушка чыга элегинде кандай болсо, дагы эле ошондой сакталган.
Экөө кол кармаша үйдөн чыгышты. Жол бою жолдошу сүйлөп баратты, Айзирек анын эмне жөнүндө сүйлөп бара жатканына маани да берген жок. Кафеге бир чети шашылса, бир чети бат эле жетип калуудан коркуп турду. Кирип тамак заказ кылышкан соң Айзирек кайра-кайра артын карай берди. Аны байкаган өмүрлүк жары “азыр келип калат, көпкө жасанчу эле” деп ого бетер бүйүрүн кызытып жатты.
Бир сааттай отурушуп, тамагын жеп бүтөйүн деп калган учурда күйөөсү ордунан тура калды. Көрсө, Айзиректин артында татынакай, колунда чоң букет гүл кармаган кыз туруптур. Кыздын сулуулугуна таң калып, эмне кыларын билбей турган учурда кыз гүлдү Айзирекке сунуп, дагы бир оролгон нерсени жолдошуна берди. Ал кызга рахмат айтып, акча сунду. Айзирек болгон ишти түшүнбөй туруп калды. Жолдошу жылмайып, Айзирекке “оролгон пакеттеги күзгүнү алып чыгып кара” деди. Жанына келип бетинен сүйүп, “мына, күзгүдөгү сулуу – менин сүйгөн жарым” деп кучагына бек кысты.
"Эми… Ошол убактан бери 10 жыл өттү, мамилебиз ошондой эле калгансыйт…" Бирок бүгүн өз көзү менен көргөн окуя… Жок, ишенгиси келбеди. “Эмнеге? Ал башка бирөө менен… Менден эмне күнөө кетти?” деген ойлор мээсинде сааттын жебесиндей тыкылдап жатты.
Айзирек бүгүн түшкү тамактануу учурунда курбусу менен жолукмак эле. Курбусу келгенче ээн-эркин отуруп сүйлөшүүгө ыңгайлуу орундукту ээлеп отурду. Жолдон сатып алган гезитти окуп отуруп, арт жагынан тааныш үндү кулагы чалды. Бурулуп карагандан уялып, ордунан жылбай катып калды. Ишенгиси келген жок. “Жок! Ал болушу мүмкүн эмес… Жана эле телефон аркылуу сүйлөшүп, жумушунда тамактана турганын айтпады беле. Окшош үндөр боло берет, мени алдамак эмес...” деп өзүн жооткотуп, күйөөсү экенине ишенгиси келбей турду. Айзирек чыгынып туруп артын карады. Балдарынын атасы бир чоочун кыз менен кучакташып, өбүшүп жатканын көргөн Айзирек өз көзүнө ишенбей, жүрөгү селт этти…
Көпкө ойлонду, карагайларды аралап жүрүп мээси чыңалгыча ойлонду. Акыры бир чечимге келди. Жолдошу өзү айтмайынча көргөнүн билмексен болуп коймой болду. Кантсе дагы балдары бар ортодо, жакшы ата, балдарын абдан жакшы көрөт. Жумушуна кылдаттык менен мамиле жасаган таланттуу журналист. “Эркек кишинин жаратылышы ушундай болуп жаралып калса, биз эмне кыла алабыз?” деди өзүн алдап. “Мындайга эмне түрткү болду? Жумуш деп керелден кечке талаада жүрүп, бир нерсени байкабай калдымбы? Билбейм… Убакыт көрсөтөр, туура таразалап, бардык нерсени өз ордуна коёр” деп, үйүн көздөй жөнөдү.
Айзирек машинада жакшы көргөн ыры жаңырып жатканын эми байкады. Ырдын таасириненби, эмнегедир жакшы маанай менен "мен бул жөнүндө эртең ойлоном" деп, машинасын катуу айдаган боюнча Бишкекти көздөй жол алды…

AeCHka,15.07.2010