Шайлоонун эртеси...

Жергиликтүү да, чет өлкөлүк да сурамжылоолордо лидерликти бербей келаткан «Ата Мекен» шайлоонун жыйынтыгында 5-орунга туруп калды. Канткен күндө да, шайлоодо ат салышып, республикалык чекти ашып өткөн партиялардын арасынан “Ата Мекен” шайлоо өнөктүгүн эң таза алпаргандыгы коомчулукта белгиленбей койбоду. Ал эми каржылык ресурсту ашкере пайдалангандар добуш берүүгө аз калганда тууган-тааныштарды ортого салып, акча таратып жатышты. Бир добуштун баасы «жүз граммдан» 2000-3000 сомго чейин чыкканын добушун саткан жарандар жана аларды мындайга түрткөн үгүтчүлөр танбас.
Ар бир партия эң башкы атаандашы катарында “Ата Мекенди” көрүп, аксакал партия катары тааныганы менен, буттан чалууга аракет жасаганын бейрасмий жасалган пиар-кампаниядан байкасак болот. Өлкөдө жымжырттык өкүм сүрүп турган маалда да Кыргызстан ичинде көрсөтүлгөн орусиялык каналдар Кремлге жүгүнүп, эл менен эсептешпей туруп, элдин сыртынан тон бычып, убада берип кайткан партияларды мактап-жактап, аларга кыр көрсөткөн “Ата Мекенди” каралап турушту. Июнь окуяларынан соң аялуу турган аймактарда Текебаев атаандаш саясатчылар тарабынан “кыргызга душман” катары караланса, башка улуттар арасында “улутчул” деп жамандалды. Жыйынтыгында улуттук азчылыктар Феликс Куловдун партиясына, ал эми регионалисттер “Ата Журтка” өз добуштарын ыраа көрүштү.
«Ата Мекендин» жеңишине ишенгендер шайлоонун жыйынтыгын укканда гана бармактарын тиштей, жеңгендердин жеңишин тааный албай, жалпы жыйынтык менен жан дүйнөлөрү макул боло албай турган чагы. Ал эми ири державага убадаларын берүүгө үлгүргөн партиялар шайлоодон соң Кремлдин командасын күтүп турушкандай...