Баткенде Ворух анклавы менен Ак-Сай айылы чектешкен жерге милициянын посту коюлду. Себеп – аймакта Кыргыз-Тажик жарандарынын жаңжалынын уланышы, тагыраагы, Тажик тараптын Кыргыз жарандарын сабап салганы. Постту эки тарап биргеликте орноткону айтылды.

Баткен ОИИББинин маалыматына таянсак, окуя мындай болгон: 17-майда Тажикстандын 2 жараны Ак-Сай айылында баратып жергиликтүү жашоочулардын намысына тийчү сөздөрдү айтышканда тургундар алары кармап алышат. Ал жерге келген Тажик чек арачысы да кармалат. Ушул эле күнү 3 Кыргыз жараны Ворухтун жашоочулары тарабынан кармалып, сабалат. Окуядан кийин эки тараптын бийлик өкүлдөрү сүйлөшүү жүргүзүп, кармалган жарандарды алмашышат. Бошотулган Кыргыз жарандары ооруканага жеткирилди. Тажикстан тарап Кыргыз жарандарын сабаган Тажик жарандары жоопко тартылат деп убада берди.

“Жаралган кырдаалдан улам Баткен жана Согди облусунун жетекчилери сүйлөшүштү. Алар чек арада жаралган көйгөйлөрдү ыкчам чечүү үчүн облус жетекчилери чек арада жума сайын жолугуп турууну макулдашты”- деп айтылат облустук администрациянын маалыматында.

Учурда сабалган жарандар ооруканада, абалдары туруктуу деп маалымдалды.

Жолдубек Качкынбаев