«Супер сулуу» сынагынын жеңүүчүсү аталып, чет өлкөдө эс алууну самагандардын тагдыры буга чейин www.super.kg сайтындагы добуш берүү аркылуу чечилип келген.
Ал эми бул жолу сынактын финалчылары биринчи жолу Cпорт Ордосунун чоң сахнасына чыкканы турушат. Дал ошол жерден бир нече сынактан өтүп, баш байгеге ээ болгон сулууга Таиландга жолдомо тапшырылат. Учурда финалга чыккан бийкечтер эл алдында кандай басып, кандай сүйлөө керектигин жана чыгыш бийин үйрөнүп жатышат.

Сынакта бийкечтер төрт тапшырманын негизинде эл алдына чыгышат.

1. Саламдашуу жана өзүн-өзү тааныштыруу. Бул бөлүмдө катышуучу эл менен саламдашып, фантазиясына жараша өзүн тааныштырып өтөт. Эч кандай чек жок. Сулуу кааласа өзүн төкмөлөрдөй төгүп ырдап тааныштырат, кааласа жомоктогу сулууга айлантат.
2. Купальникчен чыгуу. Кызыл өңдөгү окшош купальник кийген кыздардын келбетине баа берилет.
3. Чыгыш бийин бийлөө.
4. Кече көйнөгү менен басуу.

Мына ушул төрт этапты өзгөчөлүк менен басып өтүп, келишимдүү мүчөсү, ажарлуу жүзү менен калыстар тобун арбап алган селки баш байге ээси болот. Эми сөздү финалчылар кандай даярданып жатышат, ошол жакка буралы.
Сахнада кандай басуу керектигин “z fashion” моделдик агенттигинин дефиле коюучусу үйрөтүүдө. Кыздар аталган агенттикке жумасына беш жолу барышат. Сулуулардын устаты Айжамал буларга токтолду.
– “Супер сулуу” сынагында финалга чыккандардын жарымынан көбү аракетчил, көрсөткөнүңдү тез илип кете турган кыздар экен. Биринчи күнү көрсөтүп бердим эле, экинчи күнү дароо окшоштуруп кетишти. Арасында модель кыздар да бар экен. Аларга үйрөтүш оңой. Катышуучулар сөзсүз такасы 10 сантиметрден бийик бут кийим кийиши абзел. Биз кантип үйрөтүп жатабыз? Кыздар келгенде бийик такалуу бут кийим менен отуруп-туруп, 20 мүнөт көнүгүү жасашат. Бул буттарынын булчуңдарынын чоюлуп, бийик така кийгенде калтырабашына чоң жардам берет. Анан сагыз чайнабагыла деп күнүгө айтам. Сахнага чыкканда сүрдөгөндөн оозунда сагызы жок болгонуна карабай, көнүмүш адат менен жаагын чайнап алышы мүмкүн. Эгерде сахнадан чалынып жыгылып кетсе, бетин басып көшөгө артына өтө качпай, кырдаалдан кантип чыгышты да үйрөтүүдөмүн.

Сүйүн Кулматова
koom@super.kg