• Бишкек шаардык соту депутат Төрөбай Зулпукаровду камакта кармоо боюнча райондук соттун чечимин күчүндө калтырды.
• Баткенде 23-август күнү мыйзамсыз ташылып бараткан 2 миллион сомдук жүк кармалганы айтылды.
• Оңдоп-түзөө ишинен улам Төө-Ашуу туннели 23-августтан 23-сентябрга чейин, саат 07:00дөн 08:30га чейин жана 14:00дөн 15:30га чейин жабык болот.
• Мурдагы премьер-министр Мухаммедкалый Абылгазиев 50 миллион сом төлөп, үй камагына чыгарылды.
• 25-августка карата Токтогул суу сактагычында 11 миллиард 963 миллион метр куб суу бар.
• “Кумтөр” боюнча кылмышка шектелип жаткан экс-премьер Темир Сариевди Бишкек шаардык соту 30-сентябрга чейин камакта калтырды.
• Бишкекке COVID-19 илдетине каршы күрөштө каза болгон дарыгерлерге арналып атайын мемориал орнотулары айтылды.
• 23-августтан 10-сентябрга чейин Билим берүү жана илим министрлиги айрым предметтер боюнча 7-11-класстардын мугалимдерине атайын тренингдерди өтөт.
• УКМКнын Коррупцияга каршы күрөшүү кызматынын төрагасынын мурдагы орун басары, учурдагы 6-башкармалыктын башчысы Каныбек Досмамбетов кызматтан бошотулду.
• 21-августта Кара-Суу районунда 7 жашар кызды автоунаасы менен сүзүп качып кеткен айдоочу кармалды.
• Ош шаарына таштандыны кайра иштетүүчү завод куруу пландалып жатканы, 1 айдын ичинде тийиштүү долбоордун келишими даярдалары айтылды.
• Кыргыз жеринде коронавирус илдетине каршы күрөшүү боюнча 3 жылдык программа даярдалары маалымдалды.
• Чүйдүн Москва районунда Жарандык абалдын актыларын каттоо бөлүмүнүн башчысы пара алууга шектелип кармалды.
• “Кыргызтелеком” ишканасынын вице-президенти Гүлиза Чапаева кызматынан бошотулду.
• 25-августта Жалал-Абадда күчү 2,5 баллга жеткен жер титирөө катталды, жабыркагандар жок.
• Аравандагы үйлөрдүн биринен 780 миң сом жана зер буюмдарды уурдоого шектелип Өзгөн районунун 34 жаштагы тургуну кармалды.
  
  

Лунара Бекиева