Жаңы жылды кайсы өлкөлөр биринчи тосот деп ойлонуп көрдүңүз беле? Өткөн сандарда Жаңы жылда балатыны кооздоо жөрөлгөсү качан кабыл алынганы жөнүндө азын-оолак айтканбыз. Бул санда убакыттагы айырмасы боюнча кайсы өлкөлөр биринчи Жаңы жылды тосору тууралуу кеп кылалы.

Көпчүлүк өлкөлөр Жаңы жылды 1-январда, Григориан календары боюнча жылдын биринчи күнү белгилешет. Жаңы жыл стандарттуу убакытты эске алганда Тынч океандан башталат, Лайн аралдарындагы Кирибати Республикасы биринчилерден болуп тосот (саат алкагы UTC+14). Баарынан кеч Америкалык Самоа (Чыгыш Самоа), Мидуэй аралдары жана Ниуэ калкы (саат алкагы UTC–11) тосушат. Бул убакта Лайн аралдарындагы Кирибатиде 2-январь (айырма 25 саат) болуп калат. Кээ бир өлкөлөр Жаңы жылды Ай календары боюнча белгилешет.

1-январдан баштап Жаңы жылды белгилөө алгачкы жолу биздин заманга чейин 153-жылы башталган. Анткени ушул күндөн баштап Рим консулдары кызматына киришкен. Биздин заманга чейин 46-жылы Рим кол башчысы Гай Юлий Цезарь өзүнүн жаңы календарын – Юлиан календарын киргизип, биздин заманга чейинки 45-жылдын 1-январынан баштап жыл башын бекиткен.

• 1-январь – Григориан, Юлиан календары боюнча Жаңы жыл.

• 21-январдан 21-февраль аралыгында (бир күн) – Кытай Жаңы жылы.

• 21 же 22-март – Иран Жаңы жылы – Нооруз (Иран, Азербайжан, Казакстан, Кыргызстан, Тажикстан, Түркмөнстан, Өзбекстан).

• 14-апрель – Бенгаль Жаңы жылы (Бангладеш).

• Песахтан 163 күн өткөндөн кийин (5-сентябрдан эрте эмес жана 5-октябрдан кеч эмес) еврейлердин Рош ха-Шана (Израиль) майрамы. Песах – еврейлердин Египеттен бөлүнүп чыгуусуна арналган негизги майрам, зыярат кылуучу үч негизги майрамынын бири.

Эски Жаңы жыл

Эски Жаңы жыл – Юлиан календары боюнча белгиленүүчү жаңы жылдык майрам. 1901-жылдан 2100-жылга чейин Григориан жана Юлиан календарынын ортосундагы айырма 13 күндү түзөт. Юлиан календары боюнча Жаңы жыл 31-декабрдан (13-январь) 1-январга (14-январга) караган түнгө туура келет. Ал Орусия, Беларусь, Украина, Казакстан, Грузия, Армения, Азербайжан, Сербия, Швейцария жана башка өлкөлөрдө белгиленет.

Гулийпа Маметосмон кызы