Блиц маек

Орусиянын 1-каналындагы «Минута славы» долбооруна катышып келгенден кийин Атай Өмүрзаковдун ысымы кыргыздын кыйласына жетти. Мына ошондон кийин мурунку мамлекет башчысы Курманбек Бакиев Атайга “эки бөлмөлүү квартира белек кылам” деп сөз берген. Сөз бермек түгүл документке кол коюп, ошондогу шаар башчысына жөнөткөн.

– Атай, мурунку бийлик талантыңды колдоо максатында сага квартира белек кылмак экен. Бул тууралуу ким менен, качан сүйлөштүң эле?
– “Минута славы” долбооруна катышып келгенден кийин мени ал кездеги президент Курманбек Бакиев өзү чакырткан эле. Алгач 6-мартта жолукмакпыз, анан жолугушуу 30-мартка жылдырылган. Ошентип, ал күнү Бакиевдин кабылдамасында болдум. Экөөбүз көпкө маектештик. Келечек пландарымды угуп отуруп, “сенин эртеңкиңе жардам беребиз, талантыңды колдойбуз, кыргыздын атын чыгаруу оңой-олтоң иш эмес” деди. Сөз соңунда мага Политехникалык окуу жайдын тегерегинен эки бөлмөлүү квартира белек кылмай болгон.
– Документ дагы даярдалган дедиңби?
– Ооба. Менин көзүмчө ошол кездеги шаар башчысы Нариман Түлеевге кат жолдогон. Аңгыча төңкөрүш болуп кетти. Көп өтпөй Ош окуясы орун алды. Коомчулук тынчыгандан кийин мен эмес, менин жакындарым президент Роза Отунбаевага квартира тууралуу кат киргизишкен. Бирок ал кишиден жооп болгон жок. Анан өзүм президенттин аппарат жетекчиси Эмилбек Каптагаевге кирдим. Ал киши: “Ошондо даярдалган документтериңдин баары күйүп кетти. Биз бере албайбыз”,- деп койду.
– Ошентип азыркы бийликке нааразымын дечи?
– Буюрса, Кудай өмүр берсе, андай квартирага эмес, ак эмгегим менен чоң үйгө деле жетем деңизчи, бирок мамлекет анча-мынча колдоого алып, көңүл буруп койсо, мен үчүн чоң стимул болмок.
– Англияда өтүүчү чоң сынакка даярданып жатат деп уктум...
– Ооба, ал долбоордун жообун көптөн бери күтүп жаткам. Чакыруу алганыма бир жума болду. Азыр виза ачтырып, барып-келгенге каражат издеп чуркап жүрөм. Бул долбоор “Минута славы” берүүсүнө окшош, бирок дүйнөлүк долбоор. Жогорку Кеңештен жардам болобу деп алардын эшигин каккыласам, ойлогон оюм таптакыр тескери чыкты. Азырынча жеке ишкерлер көмөктөшүп жатышат. Буюрса, Лондонго 5-декабрда учам. Сынак 7-декабрда өтөт.
– Анда эмесе ийгилик, Атай, жеңил барып, оор кел.

Сүйүн Кулматова
star@super.kg