Жолборс жылын узатып, Коён жылын күтүп жаткан учур. Кыргызда “узаган жылды жамандабайт” деп коёт. Ошого карабай Жолборс жылында белгилүүлөр арасында кандай окуялар болду, көз чаптырып көрөлү.

ШИРЕЛИШКЕН КОШ ЖҮРӨКТӨР
Кудайдын кулагы сүйүнсүн, быйылкы жылы чыгармачыл чөйрөдөгү бойдок жигит-кыздардын бир башы эки болду.
Султан Садыралиев Таластын татына күйөө баласы болсо, Акбар Сүйүнбаев жердешине баш кошту. Мирбек Иманбеков кызы эки жарым жашка чыкканда үлпөт тоюн берип, ачыкка чыкты. Замир Мырза Жаңыл аттуу колуктулуу болсо, Бекчоро Назгүлүнө жетти. Алтынбек Алымов, Эрлан Андашев, Ильяз Абдыразаковдор Нарынга күйөө бала болушту. Шайырбек Арапов үйлөнүү тоюн Ошто өткөрүп келди.
Кыздардан турмушка чыгууну Мэри Шакулина баштап берди. Кенже Дүйшеева кыргыз эмес, казак жигитин колтуктап кетти. Айпери Сыдыкова Мирзамирине Кара-Көлдөн жолукса, Азиза Эмир Сарпашевди этектеди. Ди-джей Жаркынай Аманова Максат аттуу угарманынын колун кармаса, Нуриза Абазова Улук аттуу мырза менен
баш кошту.

АРДАКТУУ АТА, МЭЭРИМДҮҮ АПАЛАР
Жолборс жылында балканактай уулдуу, татынакай кыздуу болгондор арбын.
Чү дегенде эле Чубак уулу Кубаныч, ак таңдай акындар Элмирбек Иманалиев, Аалы Туткучев, Азамат Болгонбаевдер уулдуу болуп, маңдайлары жарылды. Темир Назаров, Айжамал Кабылова, Байыш Момунов, Айя Садырова, Мэри Шакулина, спортчулардан Канатбек Бегалиев, Канат Сыдыгалиев, ди-джей Замир Казакбаев, куудулдар Санжар Бердибеков, Талант Анарбаев, Жылдызбек Абдраимов да уул көрүп сүйүнүштү.
Ырчылардан Анжелика, Айбек Карымов менен Гүланда, Жаныш Момунов, Жылдыз Тутуева, ди-джейлер Бегайым Абдыкадырова, Арстанбек Абдыманов, бийчи Бакыт Байсариевдин кыздары Жолборс жылында жарыкка келишти.

ЧЫРЛУУ АЖЫРАШУУЛАР
Уй жылында унчукпай жаткандар Жолборс жылында күрүлдөп эле чыгышты бейм.
Жыл башында бири “мени сабатты” десе, экинчиси “мен сабаткан жокмун” деп Айчүрөк Иманалиева менен Анжелика таарынышты.
“Экөөбүз карын бөлөбүз” деп, анан кайра “кайнаса каныбыз кошулбайт” дегендей түр көрсөтүп, Дайыр Исмадияров менен продюсери Канат Кадыржан иштешпей калышты.
Жалал-Абаддагы концерттен соң Самат Дөөлөтбаков менен Мирбек Иманбеков мушташып, жыйынтыгында Мирбектин кулагы шишисе, Саматтын көзү көгөрүп, өздөрүнчө “концерт” уюштурушту. Экөө жараштыбы, жокпу, айтор, дымы чыкпайт.
Айдиндин тушоо кесүү концертинен соң продюсер Динара Эсенгулова менен Айдин Шер таарынышып жүрүшөт. Эми Айдин продюсеринен кечирим сурап элдешеби же өз аты менен сахнага чыгабы, а балким, ырчылык карьерасы ушуну менен токтойбу, бул да күмөн.
Шайлоодон кийин таарыныштыбы же эмне болду, айтор, Ильяз Абдыразаков менен продюсери Баяке Чааров да иштешпей калышты.
16 жылга жакын бирге иштешип, эне-баладай болуп калган Гүлшайыр Садыбакасова менен Кенже Дүйшееванын кайым айтышуусу да Жолборс жылына туш келди. Кудай жалгап, экөө кайра элдешиптир.

КЫРСЫК КАШ-КАБАКТЫН ОРТОСУНДА
Кырсыкты кайдан деп болобу, дал ушул жылы бөөдө кырсыкка учурап, аман калганына сүйүнгөндөр да жок эмес.
Ынак Осмоналиев үй-бүлөсү менен автокырсыкка учурап, жыйынтыгында машинасы талкаланып, келинчеги экөө жеңил жаракат алып дарыланып чыгышты.
Роза Шакирова менен курбусун каракчылар тоноп, сумкаларын, телефонун, акчасын, жадакалса дисктеринен бери шыпырып кетишкен.
Фарида Карбосова да жол кырсыгына кабылып, өзүнүн машинасын гана оңдоп-түзөбөстөн, уруп алган Лексусту да оңдоп, оңой эмес чыгымга учурады.
Ушундай эле жол кырсыгына Омар менен Арсен кабылып, жеңил жаракат алышты. Омар каршысындагы машинаны сүзбөй эле, ырчынын машинасын болгондо да милиция кызматкери сүзүп, "билгениңди кыл" дегендей салкын мамиле кылганын азыр да айтып кейип жүрөт.
Жол кырсыгына кабылгандардын арасында Айя Садырова да бар. Айянын буту сынып, азыр үйүндө отурат.
Жогорудагы аты аталган атактууларга мындан ары бөөдө кырсыктан алыс болгула демекчибиз.

ЖҮРӨК ЖАРЫП, ДҮЙНӨ САЛЫП КЕТИШТИ
Адамзаты дүйнөгө түркүк боло албайт турбайбызбы!
Бул жылы кыргыз эстрадасында да жоготуулар болду. Мезгилсиз дүйнө салгандардын арасында "Сүрөтүңө", "Жазым келчи" сыяктуу ырлары менен Жолдошбек Мамажанов 58 жашында өмүр менен кош айтышты.
Өз ажалынан эмес, мыкаачылык менен белгисиз бирөөлөрдүн колунан ырчы Микаэль кырчындай 24 жаш курагында ажал тапты.
Бир канча популярдуу ырлардын автору, акын, белгилүү ди-джей Медер Осмоналиевди да асылган оору Жолборс жылында жалмап тынды. Атаганат, маркумдар тирүү болсо, дагы далай жүрөк жылытчу ырларды жаратышмак, ажалга айла жок тура!

Мындан сырткары шоу дүйнөдө темир тулпарлуу болгондор, бир канча ыр жазып, клип тарткандар, келин-күйөө балалуу болгондор санай берсек толтура экен. Эмне демекчибиз, босогодо баш багып турган Коён жылы жалаң гана жакшылыктын, токчулуктун, тынчтыктын жылы болсун дейбиз!

Бурул Исмаилова
star@super.kg