Бойдоктор бурчу

«Бойдоктор бурчунун» коногу – ырчы Айнура Салахидинова. Айнура үй-бүлөдө төрт бир туугандын экинчиси. Эжеси турмушка чыгып, кезек Айнурага келген. Бул ырчы кызга кызыккан жигиттер болсо, биздин маек алар үчүн жакшы табылга.

АНКЕТА
Туулган жылы – 1984-жыл, 2-октябрь
Туулган жери – Бишкек шаары
Бою – 170 см
Салмагы – 61 кг
Фобиясы – Жалгыздык
Ким болгусу келчү – Кондитер
Ким болду – Ырчы
Учурда – Кыргыз экономикалык университетинин Маданий-эстетикалык борборунун комуз ийриминин көркөм жетекчиси

– Айнура, өзүңө-өзүң мүнөздөмө бере аласыңбы?
– Бирөөгө бат ишенем. Мени жакшы билгендер «сен өтө эле ак көңүлсүң, колу ачыктыктын да чеги болот» деп калышат. Абдан шайырмын. Бирок бат жиним келет да, ачуум тез таркап кетет. Таарынчаакмын, таарынганымдан жазылганым тез.
– Сүйүүгө кабылгансыңбы? Аны унутуу кыйынга турдубу?
– Ооба, кабылгам. Бирок ортобузда чын сүйүү жок белем, экөөбүз эки жакка кеткенбиз. Аны унутуу кыйынга деле турган жок, бат эле унутуп калдым. Чынында, аны эстегим да келбейт.
– Сенин жүрөгүңдү кандай мырзалар багынта алат?
– Биринчиден, жүрөгүм бош. Кыялымда сүрөтүн тартып алган мырзаны айтайын. Бою узун, ак жуумалынан келген, булчуңдары чыккан, дене-бою чың, мени түшүнө билген акылдуу мырза. Анан да менден башка эч кимди эркелетпесе. Таптакыр кызганбаса да кызыксыз болуп калат, туурабы? Ошондуктан кызгансын, бирок чеги менен. Себеби мурунку сүйлөшкөн жигитим менен дал ушул чектен ашкан кызганычтын айынан урушуп кеткем.
– Качан турмушка чыгайын деген оюң бар?
– Кудай буюрган күнү бир жакшы адамдын колун кармап, үй-бүлө күтөм. Жакында эле менден улуу эжемди күйөөгө узаттык. Ата-энемдин азыр ичи ачышып турган чагы. Алар «эми сен 1-2 жылдан кийин турмушка чык» дешүүдө. Дос-туугандарым «качан күйөөгө?» деп кулагымды кызытканын айтпа. Мен аларга жылын айтпай, «туулган күнүмдөн кийин күйөөгө кетем» дейм тамашалап. Ким билет, тагдыр буюрса, быйыл ата-энемди күйөө балалуу кылып сүйүнтөрмүн. Болбосо, аркы жылы...
– «Эркектин жүрөгүнө барчу жол ашказан аркылуу өтөт» дешет. Кандай тамактарды жасай аласың жана болочок күйөөңдү кайсы тамакты мыкты жасап берип кубантасың?
– Бир гана палоо басканды билбейм, калган тамактардын баарын жасайм. Дасторкон жайып, конок күткөн абдан жагат. Дайыма эле өзүмдүн фантазиям менен түркүн салаттарды жасап, анан кооз аттарды коюп алам. Алардын арасында «Айнура» деген да салатым бар. Кийин жолдошума сонун тамактарды жасап берем. Эгер эле күйөөм «палоо жасап бер» десе, анда заказ кылып алдыртам го. Себеби канча аракет кылбайын, палоо басканды эч үйрөнө албай койдум. Бирок «башка түшсө байтал жорго» дейт эмеспи, жакшылап аракет кылсам, аны деле үйрөнөрмүн.
– Эгер жолдошуң «ырчылыкты ташта, үйдө отур» десе эмне кыласың?
– Баары түгөл, жашоом тегиз болсо, эмне үчүн үйдө отурбашым керек? Жолдошумдун айтканына көнүп, үйдө отура бермекмин. «Эч качан ырдаба!» деп айткандан да Кудай сактасын, анткени жан дүйнөм ырга жакын.
– Сага кандай белек жагат? Жигиттерге кандай белек бересиң?
– Мен үчүн жүрөктөн чыккан жылуу сөз деле белек. Өзүм 5 убак намаз окугандыктан, мырзаларга жайнамаз, теспе белек кылганды туура көрөм.
– Келбетиңден кайсы жериң жакпайт?
– Боюмдун узундугу анча жакпайт. Анан да бир аз ак жуумал болгонумда жакшы болмок. Калганына кейибейм, эң негизгиси, алты саным аман жүргөнүмө сүйүнөм.
– Өзүң шаарда өсүп-чоңойсоң, айыл жергесине ала качып кетишсе кантер элең?
– Эгер жигит көңүлүмө жакса, отуруп калмакмын. Ак көңүлмүн деп айтпадымбы. Улуу апалар жоолук салып көндүрүшсө, алардын сөзүн угам. Бизде кызды ала качып келген соң кетпесин деп босогого нан коюп коёт экен го. Мен эч качан нанды аттап кете албайм. Ошентип койсом «буга боло берет экен» деп жүрүшпөсүн... Шаарда өскөнүм менен, 11-класста Нарында, таенемдин колунда 1 жыл жүрүп калдым. Уй саагандан баштап бозо салганга чейин үйрөнүп келгем. Ошондуктан элет жергесинде жашоого көнүп кетем.
– Кудай сактасын дечи, бирок кийин күйөөң көзүңө чөп салса, абалдан кантип чыгар элең?
– Мага билгизбей көзүмө чөп салса, кечирем. Эгерде эле ала жипти аттаганын билип калсам, анда мага таарынбасын. «Эрди эр кылган да, кара жер кылган да аял» деп коюшат, мен күйөөмдүн андай жолго барышына жол бербейт элем.
– Сени «куудул Эрнист Бөрүбаев менен жүрөт экен» деген сөздүн чындыгы канчалык?
– Эрнист экөөбүз «Унуталбайм» берүүсүнө тартылганбыз. Ошондон улам «экөө кыз-жигит» деген сөз чыкса керек. Эрнистти байкемдей эле көрөм.

Ашыктык ырларын созгон, айылдагы жашоого көнгөн Айнура менен таанышкысы келген жигиттер appakyz@namba.kg электрондук дарегине кат жазып, баарлашса болот.

Бурул Исмаилова
star@super.kg