Президент Садыр Жапаров 14-мартта “Кумтөрдүн” мурдагы тышкы башкаруучусу, учурда камакта отурган Теңгиз Бөлтүрүк боюнча дагы бир билдирүү жасады. Жапаров алар абактан кандай шартта бошотулушу мүмкүн экенин айтты.

– “Кумтөрдөн” 1 грамм да алтын уурдай алышпайт, канадалыктар көзөмөл системин мыкты коюшуптур. Ал эми ишканага керектүү шаймандарды, азык-түлүктөрдү сатып алууда акча уурдалган. Мен Бөлтүрүктү кызматка койгондон баштап “таза иште, 1 сомдун да изинен түшөт” деп какшап келгем. Учурда он чакты адам камакта отурат, эми алар чыгымды ордуна коюп коюшсун. Ошондо укук коргоо органдары үй камагына чыгаруу маселесин карашса керек. Аларды түрмөдө чирители деген ой жок,- деди президент.

Буга чейин Теңгиз Бөлтүрүк президентке ырайым сурап кайрылган. Анда ал “Кумтөрдөгү” коррупцияны толук жоё албадым, бирок өзүм пара алган жокмун деп билдирип, “эгер мага ишенсеңиз мындан ары да сизге жардам берүүгө даярмын, өкмөттөгү кимдир бирөөгө тоскоол болуп жатсам, анда тынч эле Канадага кетип калайын” деген эле. Жакында Бөлтүрүктүн жубайы Ильмира Алпысбаева ачкачылык жарыялаганын билдирип президентке кайрылуу жасады.