Тарыхы

Куркума – имбирь түркүмүнө кирген көп жылдык өсүмдүк. Анын тамырынан тамак-ашка кошулчу татымалдар, дары-дармек, боёк жасалат. Бул өсүмдүктүн мекени катары татымалдардын “падышасы” аталган Индия өлкөсү эсептелет. Дал ушул мамлекетте көп колдонулган карри татымалы куркумадан жасалат.

Курамы

Куркуманын курамында эфир майлары, куркумин, фосфор, темир, йод, кальций, С, К жана В тобундагы витаминдер бар.

Айымдарга пайдасы

Окумуштуулар куркуманы сезгенүүлөргө каршы мыкты каражат деп эсептешет. Андан сырткары мыкты антиоксидант, витаминдерге бай болгондуктан иммунитетти көтөрүүгө салым кошот. Айымдарга өзгөчө сулуулук жаатында жардамчы. Куркума порошогунан жасалган боткону бетке сүйкөсө, тери азыктанып, нымданып, ийкемдүүлүгү жогорулайт.

Кимдерге болбойт: кош бойлуу жана бала эмизген айымдарга, ашказан-ичеги оорусу барларга, кант диабетине каршы дары ичип жаткандарга сунушталбайт.

Мырзаларга пайдасы

Күнүнө бир чымчым куркуманы тамакка кошуп ичкен эркектин репродуктивдүү функциясы жогору болот дешет окумуштуулар. Простатит жана башка урологиялык оорулардын алдын алууга жардам берет. Дамамат бул татымалды колдонгон адамдардын булчуңдары бекем, ийкемдүү болот. Негизгиси, жүрөк-кан тамыр ооруларын алдын алууда мыкты жардамчы.

Кимдерге болбойт: инсульт, инфарктка кабылган адамдарга, кан басымы жогоруларга, уйку бези ооругандарга, боор-бөйрөк ооруларында, гастрит, ашказан жарасы, глаукома дарттары барларга сунушталбайт.

Чын эле арыктатабы?

Куркуманы арыктатуучу каражаттардын катарына кошушат. Бирок аны ашыкча же туура эмес колдонуу организмге терс таасирин тийгизет. Курамындагы куркумин затынын биологиялык сиңимдүүлүгү начар. Куркуманы кара мурч же болбосо зайтун майы менен кошо колдонуу зарыл. Анан да ачкарын ичсеңиз, ашказан ооруларына алып келиши мүмкүн. Күнүнө 1 чай кашыктан ашык колдонбоо керек. Нутрицологдор арыктайм деген адамдарга төмөндөгүдөй рецепт сунушташат: 400 грамм жылуу сууга 1 чай кашык куркума порошогун, 0,5 чай кашык кара мурч, 1 чай кашык лимон ширесин, каалоого жараша 1 чай кашык таза бал кошуп аралаштырасыз да, демдеп коёсуз. Суусундукту бир күн бою аз-аздан ичип туруңуз.