Жалал-Абад облусундагы Таш-Көмүр – Кызыл-Жар жолуна асфальт төшөөдө 29 миллион сом уурдалган. Башкы прокуратуранын билдиришинче, төшөлгөн асфальттын калыңдыгы нормадан жука экени аныкталды. “Курулуш нормаларынын талаптарын жана эрежелерин одоно түрдө бузуп, асфальт катмарын тийиштүү тыгыздыкты сактабай төшөшкөн. Жолдун сапатсыз курулганына карабай Транспорт департаментинин жооптуу кызматкерлери аны кабыл алышкан” деп айтылат маалыматта. Жыйынтыгында мамлекетке 29 миллион 104 миң сом зыян келтирилген. Бул ишке Транспорт жана коммуникациялар министрлигинин алдындагы “Кыргызавтожол” мекемесинин №38-жол-эксплуатациялоо ишканасынын кызматкерлери жооптуу.

Аталган факт боюнча Кылмыш-жаза кодексинин 337-беренеси – Кызматтык абалынан кыянаттык менен пайдалануу, 273-беренеси – Сапаты начар курулуш боюнча кылмыш иши козголуп, териштирүү башталды. Сапатсыз курулуш үчүн күнөөлүү деп табылгандар мыйзамга ылайык, 50 миң сом айып төлөөдөн тарта 5 жылга чейин эркинен ажыратылышы мүмкүн. Ал эми кызмат абалынан кыянаттык менен пайдаланууга 30 миң сом айып пул төлөөдөн тарта 10 жылга чейин эркинен ажыратуу жазасы каралган.

Аталган жол тилкесине 2022-жылы асфальт төшөлүп, 1 жылга жетпей талкалана баштаганы нааразычылык жараткан эле.