Каймак майды сызгыруу жолу менен алынган сары май эзелки кыргыз азыктарынан. Аны жай мезгилинен күзгө чейин чогултуп карынга же сыр идишке сактап, узун кыштан жайга чейин азык кылышкан. Дасторкондун көркү сары майсыз чыккан эмес. Азыр да мындай азыктарыбыз бааланып, көпчүлүк маргарин, заводдун каймак майларынын ордун сары майга алмаштырышууда. Сары май калориясы жогору болгону менен, организмге жеңил сиңет.

• Тартылган каймактар таза чогултулат.Чогултуп жаткан идиштин оозун жаап муздак жерде сактоо дурус. Каймак бузулса сары майдын даамы, түсү бузулуп, ойдогудай болбойт.

• Майды сыр идишке сызгырганга болбойт, түбүнө тартып күйөт.

• Чогултуп алган каймакты улам муздак сууга колду малып алып жакшылап жууруп суусунан арылтып, тоголоктоп алуу керек. Эгер колго жабыша берсе бир аз муздак суу кошуп жиберип жууруйт. Жуурулган каймак бат сызгырылат. Каймакты казанга салып кайнатабыз. Отту үнөмдөп жагуу зарыл. Каймак быжылдап кайнап чыкканда үстүнө бир аз ун себелеп жиберсе май бат бөлүнөт.

• Каймак сызгырууда жуурубай, суусун чыгарбай сызгырса чөбөгөсү салыштырмалуу көбүрөөк түшөт.

• Чөбөгөсү бир аз саргарып келе жатканда эле чыгаруу керек. Болбосо майдын табы менен чөбөгө дагы күйүп, май күрөң тартып калат.

• 3-4 кат дакиден сүзүп, чөбөгөсү менен майын өзүнчө бөлүп алабыз.

• Отко сызгырылган сары май менен электр плитасына сызгырылган сары майдын даамы айырмаланып турат. Оттуку даамдуу, жегиликтүү, түсү да жакшы чыгат.

• 3 килограмм каймактан 500 граммдан ашык чөбөгө, 2,8 литр май алынат.