29-августта Жалал-Абад шаарында Испаниянын белгилүү клубу “Барселонанын” академиясы ачылганы турат. Жакында эле ал академиянын курулушу аяктаганы тууралуу, академия кыргызстандык балдарга эле эмес, бүткүл Фергана өрөөнүнүн таланттуу балдарына өз эшигин ачары окуу жайдын социалдык баракчасына жарыяланды. Кыргыз футболунун тарыхындагы мындай маанилүү окуяга президент Садыр Жапаров жана “Барселона” клубунун президенти Жоан Лапорта, Роналдиньо, Пуйоль сыяктуу легендарлуу оюнчулары катышары күтүлүп жатат. “Барселона” франшизасын “Jalgroup Asia” компаниясы сатып алып келген. Академия Жалал-Абадда жана Бишкекте ишмердүүлүгүн жүргүзөт. Мындай академия Борбор Азияда биринчи жолу ачылып жатканын белгилейт компания. Буга чейин клубдун дүйнө жүзү боюнча 28 академиясы бар болчу.

Атактуу футболчу Роналдиньо бул тууралуу видеокайрылуу жасап, “Салам, Кыргызстан!” деп кыргызча учурашты. Ал өз сөзүндө “Барса” эми расмий түрдө Кыргызстанда экенин, клубдун легендалары менен бирге 3 күн чогуу Кыргызстанда болорун белгиледи.

Ошондой эле 30-августта Дөлөн Өмүрзаков атындагы стадиондо “Барселонанын” экс-оюнчуларынан түзүлгөн “Барсанын легендалары” жана Азиядагы легендалардан түзүлгөн “Азиянын легендалары” командасынын ортосунда жолдоштук беттеш орун алат. Оюнга кыргызстандык Бахадыр Кочкоров жана өзбекстандык Равшан Ирматов менен Абдухамидулло Расулов калыстык кылышат. Беттешти Кыргыз футбол уюму уюштурууда.